ސަރުކާރުގައި ތިއްބެވި ވެރިންނާ ބޭފުޅުން ރުޅިއަޔަސް، ލޭކެކުނަސް، ލޯއެޅިޔަސް ކޮންމެ ރައްޔިތަކަށްވެސް އެ ރައްޔިތުންގެ ވެރިމީހާއަށް ފާޑު ކިއުމުގެ ޙައްގު ލިބިގެންވާކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ސަރުކާރުން ހަދާ ގޯސްތަކާ އަދި ގައުމުގެ ކަންކަމުގައި ނަގާ ނުރަގަޅު ފިޔަވަޅުތަކުގެ ވާހަކަ ދައްކާ ފާޑުކިޔަމުން ގެންދަތީ ވެރިކަން ކުރާ ޕާޓީ ޕީއެންސީގެ އިސް ބޭފުޅުން ހަރުގެ ޖަލްސާތަކުގައާ އަދި އެކި ޕްލެޓު ފޯމުތަކުގައި ރައްޔިތުންނަށް ރުޅިގަޑު ބާލަމުން ގެންދާތީ ޑރ. ޖަމީލު ވަނީ އެކަމަށް އިޝާރާތްކުރައްވާ އެކްސްގައި ޕޯސްޓެއް ކުރައްވާފައެވެ.

އެގޮތުން އައްޒުމަރު ސޫރަތުގެ ނުވަ ވަނަ އާޔަތް ނަލަުކުރެއްވުމާ އެކު ޑރ. ޖަމީލު ވިދާޅުވެފައިވަނީ ދޮވެ ސައިބޯނި ލިޔަސް ޖާހިލަކު، ޢާލިމަކަށް ނުވާނެކަމަށާ ބޮޑު ޓައިއެއް އަޅާ ގޮނޑިއެއްގައި އިނަކަސް ތަންދޮރު ނުދަންނަ މީހަކާ ދަންނަ މީހަކު އެއްވަރެއް ނުވާނެ ކަމަށެވެ.

މީގެ އިތުރުން ރައީސް އަބްދުﷲ ޔާމީނަކީ ބެއިރޫތުންނާ އެމެރިކާއިން ކިޔަވާ ވިދާޅުވެގެން ހުންނެވި ބޭފުޅެއްކަމަށާ އެމަނިކުފާނު ކަންކަން ސިރާސާ ކުރައްވާ އެ ވާހަކަފުޅުތައް ދައްކަވާނެ ކަމަށެވެ.

ރާއްޖޭގެ ތަޢްލީމީ ގިނަ ބަޔަކު ސަރުކާރު ހިންގުމުގެ އިޝޫތަކަށް ބަހުސްކޮށް ފާޑުިޔާނެ ކަމަށާ އެއީ ކީރިތި ރަސޫލާ (ޞ.ޢ.ޥ)ގެ ހަދީޘްފުޅުގައިވާ ޙައްގު ބަސްބުނުން ކަމަށް ވެސް ޑރ. ޖަމީލު ވިދާޅުވިއެވެ.

ހަމައެހެންމެ ރައްޔިތުންގެ މަޖިލިހަކީ ބާރުތައް ވަކިކުރުމުގެ ދަށުން ދުސްތޫރީ ގޮތުން އެކަމަށް އޮތް އެއް މަގުކަން ފާހަގަކުރައްވާ ޑރ. ޖަމީލު ވަނީ ވެރިންނަކީ އުޑޫން ފައިބާ ބއެއް ނޫންކަން ފާހަގަކުރައްވާފައެވެ. އެއީ ރައްޔިތުންގެ ޖީބުން ބޮޑު ޚަރަދުކޮށްގެން އެމީހުންނަށް ޚިދުމަތްކުރަން ތިބޭ ޚާދިމުން ކަމަށާ އެހެންކަމުން ރުޅިއަޔަސް، ލޭކެކުނަސް، ލޯއެޅިޔަސް ކޮންމެ ރައްޔިތަކަށްވެސް ވެރިމީހާއަށް ފާޑު ކިއުމުގެ ޙައްގު ލިބިގެންވާ ކަމަށް ޑރ. ޖަމީލު ވަނީ ވިދާޅުވެފައެވެ.

ދޮގު ހަދާ، އޮޅުވާލާ، ވާޖިބު އަދާ ނުކުރާނަމަ އެވާހަކަ ރައްޔިތުން ދައްކާނެ ކަމަށާ ހަޖަމް ނުވާނަމަ އެބަޔަކު ޖެހޭނީ ވެރިކަމުން ފައިބައިގެން ދާން ކަމަށް ކަން ވެސް ޑރ. ޖަމީލުވަނީ ވިދާޅުވެފައެވެ. އަދި ރާއްޖެއަކީ ވިރާސީ ރަސްކަމެއް އޮތްތަނެއް ނޫން ކަމަށް ވެސް އަދުރޭ ޓެގް ކުރައްވާ ޑރ. ޖަމީލު ވަނީ ވިދާޅުވެފައެވެ.

.