ފަލަސްތީނުގެ މުސްލިމުންނާއި ދެކޮޅަށް ހިންގަމުންދާ ހަނގުރާމައިގައި ފަލަސްތީނުގެ ދިފާއުގައި އަޑު އުފުލަމުން އަންނަ ޑރ ޝަޒްރާ އަދި އައިޝަތު ޝާދިޔާ ހައްޔަރު ކުރި މައްސަލައިގައި ގިނަ ބަޔެއްގެ ފާޑު ކިޔުން ސަރުކާރަށައި ފުލުހުންގެ އިދާރާއަށް އަމާޒުވެއްޖެއެވެ.

މިގޮތުން މި މައްސަލަ ކުށްވެރިކޮށް ގިނަ ބަޔަކު އަންނަނީ މީސްމީޑިޔާގައި ޝުއޫރު ފާޅުކުރަމުންނެވެ.

ފުލުހުން ހައްޔަރުކޮށްފައިވާ ދެ ފަރާތްތަކުގެ ތެރެއިން އެކަކީ ދީނީ އިލްމުވެރިޔާ ޑރ މުހައްމަދު އިޔާޒުގެ އަންހެނުންނެވެ. މި ދެމީހުންގެ ބަންދަށް ކްރިމިނަލް ކޯޓުން ވަނީ ތިން ދުވަހުގެ މުއްދަތެއް ޖަހާފައެވެ.

ޚިޔާލު ފާޅުކުރުމުގެ މިނިވަންކަން ރާއްޖޭގެ ގާނޫނު އަސާސީގައި ކަށަވަރުކޮށްދީފައިވާއިރު، މުސްލިމު ގައުމެއްގެ މިނިވަންކަމަކަށް ގޮވާލާ، އެ ގައުމުގެ ދިފާއުގައި ވަކާލާތުކުރުމަކީ ކުށެއް ކަމަށް ވެގެން ނުވާނެ ކަމަށް ދިވެހިން އަންނަނީ ބުނަމުންނެވެ.

މީގެ އިތުރުން، ސަަހްޔޫނީންގެ ޕާސްޕޯޓް މަނާކުރަން ސަރުކާރުން ނުކުޅެދިފާވާއިރު، ޚިޔާލު ފާޅުކުރުމުގެ މިނިވަންކަން ދިވެހިންގެ އަތުން އަތުލައިނުގަތުމަށްވެސް ދަނީ ގޮވާލަމުންނެވެ. އަދި ސަރުކާރުން މިފަަދައިން އަމަލުކުރުމުން ސަރުކާރުގެ ސްޓޭންޑް ފަލަސްތީނުގެ މައްސަލައިގައި ރަނގަޅަށް ހާމަވެގެން ގޮސްފައިވާކަން ގިނަ ބަޔެއްގެ ޕޯސްޓްތަކުން ފާހަގަވެއެވެ.