2015 އަހަރު ފިނިފެންމާ ލޯންޗް ތެރޭގައި އެއްޗެއް ގޮވުން އެއީ ކުޅުނު ޑްރާމެއްބާއޭ އަބްދުއްރަހީމް އަބްދުﷲ (އަދުރޭ) ހިތައް އަރުވާ ސުވާލު އުފެއްދެވުމުން، އެ ޑްރާމާގެ ސްކްރިޕްޓް ލިޔުއްވީ އަދުރޭ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަަކަ ދައްކަވަމުންނެވެ.

ދާދިފަހުން ސަންގު ޓީވީއަށް އަރައި އަދުރޭ ވަނީ ފިނިފެންމާ ލޯންޗްގައި އެއްޗެއް ގޮވުން އެއީ ރައިސް ޔާމީން ކުޅުއްވި ޑްރާމާއެއްކަމަށް ވިދާޅުވެފައެވެ.

އަދުރޭގެ މިވާހަކަޔަށް ރައްދު ދެއްވަމުން ރައީސް ޔާމީން ވިދާޅުވީ އެއީ ޑްރާމާއެއް ކަމަށްވަންޏާ އެ ޑްރާމާގެ ސްކްރިޕްޓް ލިޔުނީ އަދުރޭކަަމަށެވެ.

ރައީސް ޔާމީން އިތުރަށް ވިދާޅުވީ އަދުރޭ މީގެ ކުރިން ފިނިފެންމާ ލޯންޗް ތެރޭ އެއްޗެއް ގޮއްވާލި ހާދިސާއާ ގުޅުވާ ވާހަކަ ދެއްކެވީ މިހާރު އެ ދައްކަވާ ގޮތަކަށް ނޫންކަމަށެވެ.

އިތުރަށް ރައީސް ޔާމީން ވަނީ އަދުރޭ އެފަދަ ޣައިރު ޒިންމާދާރު ވާހަކައެއް ބުނުމުން ހޯމްލޭންޑް އެންޑް ސެކިޔުރިޓީގެ މިނިސްޓަރު އަލީ އިހުސާން އެކަމަށް ޖަވާބުދާރީ ނުވުމަކީ ނާތަހުޒީބު އަމަލެއްގެ ގޮތުގައި ސިފަކުރައްވާ މޭރަމުން ވަނީ ވާހަކަދައްކަވާފައެވެ.