ސިނަމާލެ ބުރިޖުގެ އެއް ލޭން އުނިކޮށް އެ ލޭނަށް ކަނޑައެޅި ފައިސާ ނެގީ ރައީސް މުއިއްޒު ކަމަށް ބުނަނީ އަދުރޭކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެރޭ ދަ ފްރޮންޓު އޮފީހުގައި ބޭއްވި ޕީއެންއެފްގެ ޖަލްސާގައި ރައީސް ޔާމީން ވަނީ، އަދުރޭ ސަންގު ޓީވީގެ ޕްރޮގްރާމެއްގައި ދެއްކި ވާހަކަތަކަށް ރައްދު ދެއްވާފައެވެ.

އެގޮތުން ރައީސް ޔާމީން ވިދާޅުވީ، މާކަންކަން އެނގޭ މީހަކަށް ވެގެން އަދުރޭ އުޅުނު ނަމަވެސް ރައީސް ޔާމީންގެ ޒައާމަތުގައި ސަރުކާރު ހިންގުމުގެ އެއްވެސް ކަމެއްގެ މައުލޫމާތު އަދި މަޝްވަރާވެސް އެމަނިކުފާނު އަދުރޭއާ ހިއްސާކުރައްވާފައި ނުވާނެ ކަމަށެވެ.

އެހެންކަމުން ދެ އަނގައިގެ ވެރިއެއްގެ ގޮތުގައި މިހާރު އަދުރޭ ރައްޔިތުންނަށް ފާހަގަވަމުންދާއިރު އޭނާ ފަލީހަތްވަމުން ދަނީ އަމިއްލަ އިއުތިރާފުން ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާލުވީ އެމަނިކުފާނަކީ ވަޒީރުންނާ ކެބިނެޓު ބޭފުޅުންވެސް މަގާމުން ވަކިކުރެއްވުމުގައި ފަހަތށް ނުޖެހޭ ބޭފުޅެއްކަން އެމަނިކުފާނުގެ ޒައާމަތުގައި ފެނިގެން ގޮސްފައިވާނެ ކަމަށާ އެހެންކަމުން ވަކި ޑރ. މުހައްމަދު މުއިއްޒަށްވީތީ މަގާމުން ވަކިކުރައްވަން ޖެހިލުންވެވަޑައިގަންނަވަން ޖެހޭ ސަބަބެއް ނެތް ކަމަށެވެ. އަދި އެމަނިކުފާނު ވިދާޅުވީ، ބުރިޖުން ލޭނެއް މަދުވެ ރައްޔިތުންގެ ފައިސާއަށް ޚިޔާނާތްތެރިވި ނަމަ އެ ވަޒީރަކު މަގާމުން ވަކިކޮށް ތަހުގީގުވެސް ހިންގާނެ ކަމަށެވެ.

އެހެންކަމުން އަދުރޭ މސައްކަތްކޮށްފައިވަނީ ރައީސް މުއިއްޒުގެ އަގު ރައްޔިތުން ކުރިމަތީ ވައްޓާލުމަށްކަމަށް ރައީސް ޔާމީން ވަނި ވިދާޅުވެފައެވެ.