އަންހެނެއްގެ ކަރުގައި ވަޅި ޖައްސައިގެން ބިރުދެއްކި ފިރިހެންމީހާގެ ކިބައިން އެ އަންހެންމީހާ ސަލާމަތްކުރަން އުޅުމުގެ ތެރޭގައި އަނިޔާވި ފިރިހެންމީހާގެ ހާލު ރަގަޅު ކަމަށް ފުލުހުން ހާމަކޮށްފިއެވެ.

ފުލުހުން މީޑިއާތަކަށް ފޮނުވި މެސެޖެއްގައި ބުނީ އެ މީހާގެ ހާލު ރަނގަޅު ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ.

އޭނާއަށް އަނިޔާވީ ރަހީނު ކޮށްފައި ހުރި އަންހެން މީހާ ސަލާމަތް ކުރުމަށް ފުލުހުން ގޮސް އޭނާގެ ބޮލުގައި މުގުރަކުން ޖެހުމުންނެވެ. އެ މީހާއަށް ލިބުނު އަނިޔާގެ ތަފުސީލެއް ފުލުހުން ހާމަ ނުކުރި ނަމަވެސް އޭނާގެ ބޮލުން ވަރަށް ބައިވަރު ލޭ އެ ސަރަހައްދު މަގުމައްޗަށް އޮހުރިފައި ހުއްޓެވެ.

ރޭ ގަޑިން 9:30 އެހާކަން ހާއިރު ހިނގި މިހާދިސާގެ އަދާހަމަ ދެމުން ފުލުހުން ހާމަކޮށްފައިވާ ގޮތުގައި މާލޭގައި މިރޭ އަންހެނަކު ރަހީނުކުރި މައްސަލާގައި ހިމެނޭ ދެ މީހުންނަށް ވެސް އަނިޔާވި ކަމަށެވެ.

ފުލުހުން ބުނީ މާފަންނު ގެއެއްގައި ރަހީނުކޮށްފައި ހުރި އަންހެން މީހާއަށް އެ ގޭގެ ތެރޭގައި އަނިޔާ ކޮށްފައިވާ ކަމަށާއި އޭނާ ސަލާމަތް ކުރަން އުޅުމުން އެ އަންހެން މީހާ މަރާލާނެ ކަމަށް ބުނެ ކަރުގައި ވަޅި ޖައްސައި ފުލުހުންނަށް އިންޒާރު ދެމުން ދިޔަ ކަމަށެވެ.

އަންހެން މީހާގެ ކަރުގައި ވަޅި ޖައްސައިގެން ހުރެ މަގުމައްޗަށް ނެރެ އޭނާ ސައިކަލަށް އަރުވައިގެން ފިލަން މަސައްކަތް ކުރިއެވެ. ސޯޝަލް މީޑިޔާގައި އާންމުވެފައިވާ ވީޑިއޯއަކުން ފެންނަ ގޮތުގައި، އަންހެން މީހާ ސައިކަލުގެ ކުރީގައި ބައިންދައިގެން، އެ މީހާ ފުލުހުންނާ ވާހަކަތަކެއް ދައްކާ މަންޒަރު ފެނެއެވެ.

ނަމަވެސް ދެއްކި ވާހަކައެއް ވީޑިއޯއިން ސާފުނުވެއެވެ. އޭގެ އިރުކޮޅެއް ފަހުން، އެ މީހާ ވަނީ ރަހީނުކޮށްފައިވާ އަންހެން މީހާ ގޮވައިގެން ސައިކަލުގައި އެހެން ދިމާއަށް މިސްރާބު ޖަހަން މސައްކަތްކޮށްފައެވެ. އޭނާ ސައިކަލުގައި ދާން ފެށުމާ އެކު، ފުލުހުންތަކެއް ސައިކަލުގެ ފަހަތުން ދުވެފައިދާ މަންޒަރު ފެނެއެވެ.

އޭގެފަހުން އާންމުވެފައިވާ ވީޑިއޯއެއްގައި ފެންނަނީ، މަގުގައި ގިނަ އަދަދެއްގެ އާންމުން އެއްވެފައި ތިބުމުގެ ސަބަބުން، ސައިކަލުގައި އެ މީހާއަށް ކުރިއަށް ނުދެވި ސައިކަލް މަގުގެ ވަކި ހިސާބެއްގައި މަޑު ޖައްސުވައިގެން އިން އިރުވެސް އެ މީހާ އިނީ އަންހެން މީހާގެ ކަރުގައި ވަޅި ޖައްސައިގެންނެވެ.

އެ ވަގުތުގައި، ސައިކަލުތަކެއްގައި އޭނާގެ ފަހަތުން އައި ފުލުހަކު ވަނީ އޭނާގެ ބޮލުގައި މުގުރަކުން ޖަހައި ސައިކަލާ އެކު އޭނާ ބިންމައްޗަށް ވައްޓާލައިފައެވެ. އަދި އެ ވަގުތު ވަށައިގެން ތިބި ފުލުހުންނާއި އާންމުން ވެސް އަރައިގަނެ އަންހެން މީހާ އެތަނުން ސަލާމަތްކޮށްފައިވެއެވެ. އެކަމުގެ ތެރޭގައި އަންހެންމީހާއަށް ވެސް އަނިޔާވެ އައިޖިއެމްއެޗްގައި ފަރުވާ ދެމުން ގެންދާކަމަށް ކުރިން ފުލުހުން ހާމަކޮށްފައިވެއެވެ.

މިމައްސަލައާއި ގުޅިގެން ހައްޔަރު ކޮށްފައިވަނީ ށ. މިލަންދޫ، ހެޕީލޭންޑް، އަހުމަދު އަތުހަރެވެ. އޭނާއަކީ މީގެ ކުރިން ކުށެއް ސާބިތުވެ، ޖަލު ހުކުމެއް ތަންފީޒު ކުރަމުން ދިޔަ މީހެކެވެ. ނަމަވެސް މައާފު ދިނުމާއި އަދަބު ލުއިކޮށްދިނުމުގެ ޤާނޫނުން ރައީސްއަށް ލިބިދޭ ބާރުގެ ދަށުން 2022 ވަނަ އަހަރުގެ ސެޕްޓެމްބަރު މަހުގައި އޭނާ ވަނީ ދޫކޮށްލާފައެވެ.