ސަރުކާރުން އައްޔަން ކުރައްވާފައިވާ ވަޒީރުންނަށް ރުހުން ދިނުމަށްޓަކައި އާދިއްތަ ދުވަހުގެ ރޭ ތާވަލް ކުރެވި، ފެށުނު ޖަލްސާއަށް ސަރުކާރަށް ނިސްބަތްވާ ކުރީގެ އެމްޑީޕީގެ ބައެއް މެމްބަރުން ތަކުރާރުކޮށް ހުރަސްއެޅުމުގެ ސަބަބުން ޖަލްސާ ނިންމާލައިފިއެވެ.

މަޖިލީހުގެ ލައިވްސްޓްރީމުން ފެނުނު ގޮތުގައި މި މެމްބަރުން ވަނީ ރައްޔިތުންގެ މަޖިލީހުގެ ރައީސް މުހައްމަދު އަސްލަމް ޖަލްސާ ކުރިޔަށް ގެންދަވަން މަސައްކަތް ކުރުމުން "ދުންމާރި" ފުމެ އަޑުގަދަކޮށް މަޖިލީހުގެ ތަޅުމުގައި އިހްތިޖާޖްކޮށްފައެވެ.

އަސްލަމް ވަނީ މަޖިލީހުގެ ގަވައިދުގެ 197 ވަނަ މާއްދާގައި ބުނާގޮތައް މެމްބަރުންނަށް އަމަލުކޮށްދެއްވުމަށްެވެސް އެދިފައެވެ. އެހެންނަމަވެސް މެމްބަރުން އަސްލަމްގެ ވާހަކަތައް މާބޮޑު ސަމާލުކަމެއް ދެއްވާފައިނުވެއެވެ.

ސަރުކާރުގެ ވަޒީރުންނަށް ރުހުން ދިނުމުގައި ލަސްތަކެއް އުޅެފައިވާއިރު، އެކަން ކުރެއްވުމަށް ދައުރުން ބޭރު ޖަލްސާއެއް އާދިއްތަ ދުވަހު ތާވަލްކޮށް ކުރިޔަށްގެންގޮސްފައި ވާއިރު، މަޖިލީހުގެ މެޖޯރިޓީ އޮންނަ އިދިކޮޅު އެމްޑީޕީން ވަނީ ބައެއް މެމްބަރުންނަށް ރުހުން ނުދިނުމަށް ނިންމާފައެވެ.

އެގޮތުން، ބަންޑާރަ ނައިބާއި، އިކޮނިމިކް މިނިސްޓަރާއި، ހައުސިންގ މިނިސްޓަރާ އިސްލާމިކް މިނިސްޓާރަށް ފާޅުގައި ރުހުން ނުދޭނަންކަމަށް މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެމްބަރު އަހްމަދު ސަލީމް ވަނީ މަޖިލީހުގައި ބަހުސް ކުރައްވަމުން ވިދާޅުވެފައެވެ. އެކަމާއި ގުޅިގެން ރައީސް ކުރެއްވި އަމުރެއްގެ ދަށުން ސަރުކާރުގެ އިސް މަގާމްތަކުގައި ތިއްބަވާ ފަރާތްތަކުން ވަނީ މަޖިިލިސް ދޮރުމަތީ އިހްތިޖާޖްކޮށްފައެވެ.

އާދިއްތަ ދުވަހުގެ މެންދުރު 1:30 ގައި ވަޒީރުންނަށް ރުހުން ދިނުމަށްޓަކައި ވޯޓަށް އެހުން ތާވަލް ކޮށް ޖަލްސާ ފެށުމުން ސަރުކާރަށް ނިސްބަތްވާ ކުރީގެ އެމްޑީޕީ މެމްބަރުންވަނީ އިދިކޮޅު މެމްބަރުން މަޖިލިސް ޖަލްސާ ކުރާ ކޮޓަރިން ބޭރަށް ނެރެފައެވެ. އަދި މަޖިލީހުގެ ގަވައިދާ ހިލާފްވެ ތަޅުމުގައި މާރާމާރީވެސް ހިންގާފައެވެ.

އޭގެފަހުން ދެން ޖަލްސާއެއް އާދިއްތަ ދުވަހުގެ ރޭގަނޑު 8:00 އަށް ތާވަލްކޮށް ޖަލްސާ ފެށުމުން ހަމަ އެ މެމްބަރުން ވަނީ އިހްތިޖާޖްކޮށް އަޑުގަދަކޮށްފައެެވެ. އެހެންކަމުން އެަގުތުވެސް މަޖިލީހުގެ ރައީސް ވަނީ ޖަލްސާ މެދުކަނޑާލަން މަޖްބޫރުވެފައެވެ. އޭގެފަހުންވެސް ވޯޓުލުމުގެ ކަންކަން ކުރިޔަށް ގެންދިޔުމަށް މަސައްކަތް ކުރުމުން އެ މެމްބަރުންގެ ސަބަބުން ވަނީ ނާކާމިޔާބުވެފައެވެ.

ސަރުކާރަށް ނިސްބަތްވާ މެމްބަރުންގެ ފަރާތުން މިފަދަ އަމަލުތަކެއް ފެނުމުން ގިނަ ފަރާތްތަކުން އަންނަނީ ސަރުކާރަށް ފާޑުކިޔަމުންނެވެ.