ބުރާސްފަތި ދުވަހުގެ ރޭ އަންހެނެއްގެ ކަރުގައި ވަޅި ޖައްސައިގެން ބިރު ދެއްކި އާދަމް އަތުހަރު، 32، ޝަރީއަތް ނިމެންދެން ބަންދު ކުރަން ކްރިމިނަލް ކޯޓުން އަމުރުކޮށްފި އެވެ.
ބަންދުގެ މުއްދަތު އިތުރު ކުރަން ފުލުހުންގެ ފަރާތުން ހުށަހެޅީ އަތުހަރުގެ ޣައިރު ހާޒިރުގަ އެވެ.
ނަމަވެސް އޭނާގެ ހާލު މިހާރު ރަނގަޅު ކަމަށް ޑޮކްޓަރުންނާ ހަވާލާދީ ފުލުހުން ވަނީ ބުނެފައެވެ.
ފުލުހުން ބުނީ އަތުހަރު ޑޮކްޓަރަށް ދައްކައި މިހާތަނަށް ހަދާފައިވާ މެޑިކަލް ޓެސްޓުތަކާއި ސީޓީ ސްކޭންގެ ނަތީޖާއަށް ބަލާއިރު ޓެސްޓުތައް ނޯމަލް ކަމަށެވެ.
އަތުހަރަށް ބޮޑަށް އަނިޔާވީ ރަހީނު ކޮށްފައި ހުރި އަންހެން މީހާ ސަލާމަތް ކުރުމުގެ ތެރޭގައި ފުލުހުން ގޮސް އޭނާގެ ބޮލުގައި މުގުރުން ޖެހުމުންނެވެ.
އަތުހަރަށް ލިބުނު އަނިޔާގެ ތަފުސީލެއް ފުލުހުން ހާމަ ނުކުރި ނަމަވެސް އޭނާގެ ބޮލުން ވަރަށް ބައިވަރު ލޭ އެ ސަރަހައްދު މަގުމައްޗަށް އޮހުރިފައި ހުއްޓެވެ.
އެ ހާދިސާއާ ގުޅިގެން އަތުހަރު ބުރާސްފަތި ދުވަހުގެ ރޭ ފުރަތަމަ ގެންދިޔައީ އޭޑީކޭއަށެވެ. އެއަށްފަހު އެ ރޭ ފަތިހު އޭނާ އައިޖީއެމްއެޗްއަށް ގެންގޮސްގެން ފަރުވާ ދިނުމަށްފަހު، އިއްޔެ ހެނދުނު ހޮސްޕިޓަލުން ދޫކޮށްލުމުން ކަސްޓޯޑިއަލްއަށް ގެންދިޔަ އެވެ.
އަތުހަރުގެ ހާލު ގޯސްވެގެން އަނެއްކާ އައިޖީއެމްއެޗް ހޮސްޕިޓަލަށް ގެންދިޔައީ އިއްޔެ ހަވީރު އެވެ.
