ކ. ހުވަފެންފުށި ރިސޯޓު ކައިރީގައި އޮތް ސޭންޑްބެންކަކަށް ދަތުރު ދިޔަ މީހަކު ގެއްލުނު މައްސަލައިގައި ޝައްކުކުރެވޭ ކަންތައްތަކެއް ހުރި ކަމަށް ފާހަގަވެފައި ވާތީ ޖިނާއީ ތަހުގީގެއް ފަށާފައިވާ ކަމަށް ދިވެހި ފުލުހުންގެ ހިދުމަތުން ބުނެފިއެވެ.
މާލޭ ސިޓީ ކައުންސިލްގެ އިލެކްޓްރީޝަނަކަށް މަސައްކަތް ކުރަމުން އަންނަ ތަސްލީމް މުހައްމަދު، މިދިޔަ އޮގަސްޓުމަހު 29 ވަނަ ދުވަހު ކ. ހުވަފެންފުށި ރިސޯޓު ކައިރީ އޮތް ސޭންޑްބޭންކަށް ދަތުރުގޮސް އުޅެނިކޮށް ގެއްލުމާ ގުޅިގެން އޭނާ ހޯދުމަށް ބޮޑު ސަރަހައްދެއް ބަލާފައިވާ ކަމަށް ސަލާމަތީ ބާރުތަކުން ހާމަކޮށްފައިވެއެވެ.
އޭނާ ގެއްލިގެން ހޯދަމުންދާ ކަން ފުލުހުން ހާމަ ކުރީ ހޮނިހިރު ދުވަހުއެވެ. އޭގެ ކުރީން އާއިލާއާ ހަވާލާދީ މީޑިއާތަކުން ވަނީ ތަސްލީމް ގެެއްލިގެން އުޅޭކަން ރިޕޯޓް ކޮށްފަ އެވެ. ފުލުހުން އެކަން ހާމަކުރީ މީޑިއާތަކުން ސުވާލު ކުރުމުންނެވެ.
ފުލުހުން މީޑިއާ އޮފިސަރު ވިދާޅުވި ގޮތުގައި އެ މައްސަލާ ގައި ސުވާލު އުފެދޭ ގިނަ ކަންތައްތަކެއް ހުރިކަން ވަނީ ފާހަގަ ކުރެވިފައެވެ. އެއީ ސީރިއަސް ކަންތައްތަކެއް ކަން ފާހަގަކުރައްވާ ފުލުހުންގެ މީޑީޔާ އޮފިސަރ ވިދާޅުވީ އެ މައްސަލާ ގައި ޖިނާއީ ތަހުގީގެއް ފަށާފައިވާ ކަމަށެވެ. ނަމަވެސް އިތުރު ތަފްސީލެއް ނުދެއްވައެވެ.
އެހެން ކަމުން އެ މައްސަލާ ގައި ބަޔަކާ ސުވާލުކުރި ކަމެއް އަދި އެ މައްސަލާ ގައި ފުލުހަށް ފާހަގަ ކުރެވުނު ސުވާލު އުފެދޭ ކަންކަމަކީ ކޮބައި ކަމެއް ނަމަވެސް ސާފު ކޮށްދެއްވާފައިނުވެއެވެ.
ތަސްލީމު ގެއްލިފައިވަނީ މޫދަށްކަން ކަށަވަރު ކުރެވިފައި ނުވާތީ އާއި މެރިޓައިމް ސާޗް އެންޑް ރެސްކިއުން އިން ކޭސް އެއް ގޮތުގައި ރަޖިސްޓްރީކޮށްފައި ނުވާތީ އޭނާ ހޯދުމުގެ އޮޕަރޭޝަން މިހާރު ލީޑުކުރަމުން ދަނީ ފުލުހުންނެވެ.
ތަސްލީމު ހޯދަން ފިނޮޅު ވަށައިގެން 5000 އަކަ ފޫޓުގެ ސަރަހައްދެއް ސްނޯކަލް ކޮށްގެންނާއި 3000 އަކަ ފޫޓު ކަނޑުއަޑިން ޑައިވްކޮށްގެން ސިފައިން ވަނީ ބަލާފަ އެވެ.
