އަންހެނަކު ރަހީނުކޮށް ވަޅީން ބިރުދައްކާ މަރާލާނެ ކަމުގެ އިންޒާރު ދިން މައްސަލާގެ ތުހުމަތުގައި ހައްޔަރުކޮށްފައި ހުއްޓާ، ދަން ޖެހިގެން ފަރުވާ ދެމުން ދަނިކޮށް މަރުވި އާދަމް އަތުހަރުގެ މަރާ ގުޅިގެން ފުލުހުން މިރޭ ނޫސްވެރިންގެ ބައްދަލުވުމެއް ބާއްވަން ނިންމައިފިއެވެ.

ހޯމް މިނިސްޓްރީއިން ހާމަކޮށްފައިވާ ގޮތުގައި މިރޭ 10:00ގައި މިނިސްޓަރު އަލީ އިހުސާން ނޫސްވެރިންނާ ބައްދަލުކުރެއްވުން އޮންނާނެ ކަމަށާ ނަމަވެސް ބައްދަލުވުން ލައިވް ނުކުރެވޭނެ ކަމަށެވެ. ބެލެވޭ ގޮތުގައި ނޫސްވެރިންގެ ބައްދަލުވުން ލައިވް ނުކުރެވެނީ ކަމާ ގުޅުން ހުރި ހައްސާސް މައުލުމާތުތަކެއް ބައްދަލުވުމުގައި ހިއްސާކުރާނެތީއެވެ.

ނަމަވެސް ގިނަ ނޫސްވެރިން ގެންދަނީ އެކަމާ ގުޅިގެން ނުރުހުން ފާޅުކުރަމުންނެވެ.

ށ. މިލަންދޫ، ހެޕީލޭންޑް، އާދަމް އަތުހަރު، މަރުވި މައްސަލައިގެ ތަފްސީލް މިރޭ ނޫސްވެރީންނާއި ހިއްސާ ކުރަން ނިންމާފައިވާއިރު، އޭނާ މަރުވީ ދޫނިދޫ ޖަލުގައި ފުލުހުންގެ ބެލުމުގައި ދަށުގައި ހުއްޓާ އަމިއްލައަށް ދަން ޖެހިގެން މަރުވަން މަސައްކަތްކޮށްފައިވަނިކޮށް ސަލާމަތްކޮށްގެން ގޮސް އައިޖީއެމްއެޗްގައި ވެންޓިލޭޓަރުގައި ފަރުވާ ދެމުން ގެންދަނިކޮށެވެ.

އަތުހަރު މަރުވީ ހަވީރު 4:08 ގައެވެ. އަދި ބުނީ އޭނާ ނިޔާވި މައްސަލަ ތަހުގީގު ކުރަމުންދާ ކަމަށެވެ. ފުލުހުން ހިންގާ އެ ތަހުގީގަށް އޭނާގެ އޮޓޮޕްސީ ހެދުމަށް ނިންމާފައިވާ ކަމަށް ވެސް ބުންޏެވެ.

ފުލުހުން ބުނީ އޮޓޮޕްސީ ހެދުމުގެ ބޭނުމަކީ ކޭސް އޮފް ޑެޓް ދެނެގަތުމާއި މަރުވުމުގައި އެހެން އިތުރު ސަބަބެއް ނެތްކަން ޔަގީން ކުރުމަށް ކަމަށެވެ.

ފުލުހުންގެ ބަންދުގައި ހުއްޓާ އަތުހަރު ދަންޖެހުމާ ގުޅިގެން ގިނަ ބަޔަކު ދަނީ ސުވާލު އުފައްދަމުންނެވެ. ދަންޖެހުނީ ކޮންއެއްޗެއް ބޭނުން ކޮށްގެން ކަމެއް ފުލުހުން ނުބުނެ އެވެ.