އަންހެނެއްގެ ކަރުގައި ވަޅި ޖައްސައި ރަހީނުކުރި މައްސަލާގައި ށ. މިލަންދޫ, ހެޕީލޭންޑު އާދަމް އަތުހަރު އަމިއްލައަށް މަރުވާން މަސައްކަތް ކޮށްގެން ފަރުވާ ދެމުން ދަނިކޮށް މިއަދު ހަވީރު މަރުވެގެން ދިޔައީ ފުލުހުންގެ އިހުމާލުން ކަމަށް އޭނާގެ އާއިލާއިން ތުހުމަތުކޮށްފިއެވެ.

އަތުހަރުގެ އާއިލާއާ ހަވާލާދީ އޮންލައިން ބައެއް ނޫސްތަކުގައި ރިޕޯޓުކޮށްފައިވާ ގޮތުގައި، އަތުހަރު މަރުވި ފަހުން އޭނާގެ ހަށިގަނޑު އާއިލާއަށް ދެއްކި އިރު، އޭނާ ދަންޖެހިފައިވާ ކަމުގެ އެއްވެސް ނިޝާނެއް ފެންނަން ނެތް ކަމަށެވެ.

އަތުހަރުގެ މަރުގެ ތަހުގީގަށް އޭނާގެ ހަށިގަނޑު ޕޯސްޓްމޯޓަމް ހަދަން ނިންމާފައިވާ ކަން ފުލުހުން މިއަދު ހާމަކުރި އެވެ. އެހެން ނަމަވެސް އާއިލާއިން ހާމަކޮށްފައިވާ ގޮތުގައި އޭނާގެ ޕޯސްޓްމޯޓަމް ހަދަން އާއިލާއިން އެއްގޮތަކަށް ވެސް ބޭނުން ނުވާ ކަމަށެވެ.

އާއިލާއަަށް އަތުހަރުގެ ހާލަތުގެ މައުލޫމާތުތައް ނުލިބި ގޮސްފައިވާތީވެ އެ ކަމުގެ ކަންބޮޑުވުން ވެސް ފާޅުކޮށްފައިވެ އެވެ.

މި މައްސަލާގައި ހޯމް މިނިސްޓަރު އަލީ އިހުސާން މިރޭ 10 ޖަހާއިރު ނޫސްވެރިންނާ ބައްދަލުކޮށް، ނޫސްވެރިންގެ ހުރި ސުވާލުތަކަށް ޖަވާބު ދިނުމަށް ވެސް ވަނީ ހަމަޖެހިފަ އެވެ.

ފުލުހުންގެ ބެލުމުގެ ދަށުގައި ދޫނިދޫގައި ހުއްޓައި އަމިއްލައަށް މަރުވާން މަސައްކަތް ކޮށްގެން ހޮސްޕިޓަލުގައި ފަރުވާދެމުން ދަނިކޮށް އަތުހަރު މަރުވީ މިއަދު ހަވީރު 4:08 ގަ އެވެ. މަރުވިއިރު އޭނާ އޮތީ ވެންޓިލޭޓަރުގަ އެވެ.

އަންހެނަކު ރަހީނުކޮށްގެން އުޅޭކަމުގެ މައުލޫމާތު ލިބިގެން ފުލުހުން ދިޔުމުން އަތުހަރު ވަނީ އެ އަންހެން މީހާގެ ކަރުގައި ވަޅި ޖައްސައި ފުލުހުންނަށް ފިލަން މަސައްކަތް ކޮށްފަ އެވެ. އަންހެން މީހާ ސަލާމަތްކުރަން އުޅުމުގެ ތެރޭގައި ފުލުހުންގެ ފަރާތުން އަތުހަރަށް އަނިޔާތަކެއް ލިބުނެވެ.

އެހެން ނަމަވެސް އެ އަނިޔާތަަކަށް އޭޑީކޭގައި ފަރުވާ ދިނުމަށްފަހު ދޫކޮށްލުމުން އަތުހަރު ވަނީ ފުލުހުންގެ ބެލުމުގެ ދަށަށް ގެންދިޔަ އެވެ. އޭގެ ފަހުން ހުކުރު ދުވަހު ވެސް އޭނާ ހޮޑު ލެވޭތީއާއި ފިޓު ޖެހިގެން އައިޖީއެމްއެޗަށް ގެންދިޔަ އެވެ. ހަމަ އެ ދުވަހު ހޮސްޕިޓަލުން ދޫކޮށްލުމުން އޭނާ ބަންދުކުރި އެވެ. އަދި ކޯޓުން ޝަރީއަތް ނިމެންދެން ބަންދު ކުރުމުގެ އަމުރެއް އޭނާގެ ޣައިރު ހާޒިރުގައި ހޯދި އެވެ.

އަމިއްލައަށް މަރުވާން އަތުހަރު މަސައްކަތް ކުރީ ރޭގެ ވަގުތެއްގަ އެވެ. ފުލުހުން ބުނީ 23 މިނެޓު ތެރޭގައި ފަރުވާ ދިނުމަށް އޭނާ ހޮސްޕިޓަލަށް ގެންދިޔަ ކަމަށެވެ. މިކަން ފުލުހުން ހާމަ ކުރީ ރޭ 19:42 ގަ އެވެ. އަތުހަރު ވެންޓިލޭޓަރުގައި އޮތްކަން ފުލުހުން ހާމަކުރީ ރޭގެ 21:57 ގަ އެވެ.

މި ހާދިސާގެ ތަހުގީގު ފުލުހުން ވަނީ ފަށައިފަ އެވެ. މީގެ އިތުރުން ދަން ޖެހެން އުޅުނު މައްސަލަ އެޗްއާރުސީއެމް އާއި ނެޝަނަލް އިންޓެގްރިޓީ ކޮމިޝަނުން ވެސް ދަނީ ތަހުގީގު ކުރަމުންނެވެ.