ބޮޑު ކަންނެލީގެ ލޭނު މަސްވެރިކަން ކުރަން ހުޅުވައިލަން ސަރުކާރުން ނިންމި ނިންމުން ބަދަލު ކުރަން ރައީސް ޑރ. މުހައްމަދު މުއިއްޒު ނިންމެވީ ފިޝަރީޒް މިނިސްޓަރީ އާ މަޝްވަރާ ނުކޮށްކަން، ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޕީއެންއެފްއިން ރޭ ބޭއްވި ޖަލްސާގައި ޔާމީން ވިދާޅުވީ ލޭނު މަސްވެރިކަން ކުރަން ހުއްދަ ދިނުމުގެ މަސައްކަތް ފެށީ، ރައީސް މުއިއްޒު ވިދާޅުވެގެން ކަމަށާއި، އެކަމަށް ތައްޔާރުވަމުން ދަނިކޮށް، ނިންމުން ކެންސަލްކުރީ ޝިޔާމްގެ ލަފައެއް ވެސް ހޯދުމެއް ނެތި ކަމަށެވެ.

ބޮޑު ކަންނެލީގެ ލޭނު މަސްވެރިކަމަށް ހުއްދަ ދޭން ވަޒީރުންގެ މަޖިލީހުން ނިންމީ ޖޫން 13، 2024 ގަ އެވެ. އެ ނިންމުން ބަދަލު ކުރަން ރައީސް މުއިއްޒު ނިންމެވީ އޯގަސްޓު 29، 2024 ގަ އެވެ.

ލޭނު މަސްވެރިކަން ކުރުމުގެ ހުއްދަ ދޭން ސަރުކާރުން ހުޅުވައިލަން އުޅުނީ އިންޑިއަން އޯޝަން ޓޫނާ ކޮމިޝަން (އޯއައިޓީސީ) އިން ކޮންމެ އަހަރަކު އިންޑިއާ ކަނޑުގައި މަސްވެރިކަން ކުރެވޭނެ ލިމިޓު ނުވަތަ މަސް ބޭވޭނެ އަދަދު ކަނޑައަޅައި ރާއްޖެއަށް ދޭ ކޯޓާ އާ އެއްވަރަށް މަސް ނުބޭނޭ ކަމަށް ބުނެ އެވެ.

ލޭނު މަސްވެރިކަން ހުއްދަ ކުރަން ނިންމި ނިންމުން ސަރުކާރުން ބަދަލު ކުރީ މިނިސްޓަރގެ އިތުރުން މަސްވެރިންނާއި ތިމާވެށި ހިމާޔަތް ކުރަން މަސައްކަތް ކުރާ ޖަމިއްޔާތަކާއި ބޭރުގެ ގައުމުތަކުން ވެސް ލޭނު މަސްވެރިކަމަށް ހުއްދަ ނުދޭން ގޮވާލާފައި އޮއްވަ އެވެ.

ރައީސް މި ބީދައިން ކަންތައް ކުރައްވާނަމަ މިނިސްޓަރުން އިސްތިއުފާދީ މުއިއްޒުއަށް އޮންނަ އިތުބާރު ގެއްލެމުންދާނެ ކަމަށް ޖަލްސާގައި ރައީސް ޔާމީން ސިފަކުރެއްވިއެވެ.