ފުލުހުން ޢަމަލުކުރި ގޮތަކާމެދު ޚިޔާލު ތަފާތު ވެގެން އުޅެނިކޮށް، އެކަމެއް ދިފާޢުކުރުމަކީ ހެޔޮވެރިކަން ކުރުމެއް ނޫން ކަމަށް ރައީސް އޮފީހުގައި ލީގަލް އެފެއާޒުގައި މަސައްކަތްކުރެއްވި އަދި ކުރިން ގައުމީ ސަލާމަތީ ޚިދުމަތުގައިވެސް ހިދުމަތްކޮށްދެއްވާފައިވާ ޑރ. ޝަމްސުލް ފަލާހު ވިދާޅުވެއްޖެއެވެ.

އެ ބޭފުޅާ މިފަދައިން ވިދާޅުވެފައިވަނީ ފޭސްބުކްގައި ކުރެއްވި ޕޯސްޓެއްގައެވެ.

އެގޮތުން ޑރ. ފަލާހު ވިދާޅުވެފައިވަނީ، ފުލުހުން ޢަމަލުކުރި ގޮތަކާމެދު ޚިޔާލުތަފާތުވުން އުފެދޭ ޙާލަތެއްގައި، އެކަމެއްގެ ރިވިއު ނުނިމެނީސް، ޕޮލިސް ކޮމިޝަނަރު ނުވަތަ ފުލުހުންނަށް ޒިންމާވާ ވަޒީރުވިޔަސް، އެކަމެއް ދިފާޢުކުރުމަކީ ޑިމޮކުރަސީތަކުގައި ހެޔޮވެރިކަން ކުރުމުގެ ވައްޓަފާޅިއާ އެއްގޮތް ކަންކަން ނޫން ކަމަށެވެ.

ހަމަ އެހެންމެ ކަމެއް ހިނގިގޮތުގެ ރިވިއު ނުނިމެނީސް، ކޮމިޝަނަރާއި ވަޒީރު އެކަމެއް ދިފާޢުކުރުމުން، ނޭދެވޭ ޙާލަތްތައް ކުރިމަތިވުމުގެ ފުރުސަތު އޮންނަކަން ފާހަގަކުރައްވާ ޑރ. ފަލާހު ވަނީ އެހާލާތްތައް ވެސް ވިދާޅުވެދެއްވާފައެވެ.

އެގޮތުން:

- އެކަމުގެ ރިވިއު އެންމެ ފުރިހަމަ ގޮތުގައި މިނިވަންކަމާއެކު ކުރުމަށް ހުރަސް އެޅުން.

- ރިވިއުގެ ނަތީޖާ ވަކިކޮޅަކަށް ނުކުތުމަށް ނުސީދާ ނުފޫޒު ފޯރުން.

- ރިވިއުގެ ނަޒާހަތްތެރިކަމާއި އިތުބާރު ކުޑަވުން.

- ރިވިއުގެ ނަތީޖާ، ކޮމިނަޝަރާއި ވަޒީރު ކުރިން ބުނި ބުނުމާ ތަފާތުވެއްޖެނަމަ، އެދެމީހުންގެ އިތުބާރުގެއްލުން ވެސް އެ ހާޅަތްތަކުގައި ހިމެނޭކަން ފާހަގަކުރައްވާފައިވެއެވެ.

އެ ޕޯސްޓުގައި އިތުރަށް ވިދާޅުވެފައިވަނީ، ޚާއްޞަކޮށް، ބާރުގެ ބޭނުން ކުރުމުގައި ހާލަތާ ނުބައްދަލު ބާރެއް ފުލުހުން ބޭނުންކުރި ކަމުގެ ތުހުމަތެއް ކުރެވި އާންމުންގެ މެދުގައި ޚިޔާލު ތަފާތުވާ ޙާލަތްތަކުގައި، ކޮމިޝަނަރާއި ވަޒީރު ބަޔާނެއް ދޭންވާނީ ވަރަށް ވިސްނުންތެރިކަމާއެކު ކަމަށެވެ.

ޑރ. ފަލާހު މިފަދައިން ޕޯސްޓު ކުރައްވާ އިޝާރާތްކުރައްވަނީ ބެލެވޭ ގޮތުގައި އަންހެނަކު ރަހީނުކޮށްގެން ހަމަލާ ދޭނެކަމުގެ ބިރު ދެއްކި ފިރިރހެން މީހާ ހައްޔަރުކުރުމުގައި ފުލުހުން އަމަލު ކުރި ގޮތާ މެދު ރައްޔިތުންގެ މެދުގައި ޚިޔާލު ތަފާތުވެ އެކަމުގެ ކަންބޮޑުވުމާ ފާޑުކިޔުން މީސް މީޑިޔާގެ މަންސަތަކުގައި އާންމުވެފައިވާތީ އެކަމަށެވެ.

އަންހެން މީހާ ރަހީނުކުރި، އާދަމް އަތުހަރު މިހާރު މަރުވެފައިވާއިރު، އޭނާ ހައްޔަރު ކުރުމުގައި ފުލުހުން އަމަލު ކުރީ ފުލުހުން ޕްރޮފެޝަނަލް ސްޓޭންޑަޑާ އެއްގޮތަށް ނޫންކަމަށް ކުރީގައި ފުލުހުންގެ ޚިދުމަތުގައި އިސްކޮށް ހަރަކާތްތެރިވެފައިވާ ބޭފުޅުން ވިދާޅުވެފައެވެ. އެގޮތުން އޭނާ ހައްޔަރުކުރުމަށް ނުވަތަ އަންހެން މީހާ ސަލާމަތް ކުރުމަށް ފުލުހުން މުގުރުބުރިން އޭނާގެ ބޮލުގައި ޖެހުމަކީ ގޯސްކޮށް ކުރި ކަމެއް ކަމަށާ އަދި ވައްޓާލުމަށް ފަހުވެސް އޭނާގެ ބޮލުގައި މުގުރުން އެތައް ފަހަރަކު ޖެހި މަންޒަރު ހާމަވެފައިވާއިރު އެއީ ވެސް ގޯސްކޮށް ކޮށްފައިވާ ކަމެއް ކަމަށް ބުނެފައިވެއެވެ.