އަދުގެ ސަރުކާރުން ކުރާ ކަންކަމުގައި ދޮގު ހައްދަވައި އޮޅުވާލައްވާ ކަމަށާއި އެ ދޮގުން ސަލާމަތްވުމަށް ވެސް ހައްދަވަނީ ދޮގު ކަމަށް  ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.އެގޮތުން އެމަނިކުފާނު ވިދާޅުވީ ބްރިޖުގެ ލޭންއާ ގުޅޭ ގޮތުން މުއިއްޒު އަދި އަދުރޭ ދެއްކެވި ވާހަކަތަކަކީ "ބުހުތާނު ދޮގު" ކަމަށެވެ.

ހޯމަ ދުވަހުގެ ރޭގެ ޖަލްސާގައި ވަނީ ރައިސް ޔާމީންގެ ސަރުކާރުގައި ބްރިޖު އެޅުމުގެ އަމަލީ މަސައްކަތް ފެށުމަށް އެމްއޯޔޫގައި ސޮއިކުރުމަށް ފަހުއޭރު ހައުސިން މިނިސްޓަރަކަށް ހުންނެވި ރައީސް މުއިއްޒު ނޫސްވެރިންގެ ބައްދަލުވުމެއްގައި ބްރިޖު މަޝްރޫއުގައި ހަ ލޭން އޮންނާނެ ކަމަށް ވިދާޅުވި ވާހަކަތަކުގެ ވީޑިއޯއެއް ދައްކައި މިފަހުން ސަންގް ޓީވީގައި ރައީސް މުއިއްޒު ދެއްކެވި ވާހަކަތަކާ އަޅާބަލާފަ އެވެ.

ރައީސް ޔާމީން ވިދާޅުވީ ބްރިޖަކީ ރައްޔިތުންގެ ވަރަށް ބޮޑު ބޭނުމަކަށް ހަދާފައި އޮތް ތަނެއް ކަމަށާއި އެފަދަ ތަނެއް ހަދާއިރު ހަދާނީ މުސްތަގުބަލުގައި 100 އަހަރަށް ބޭނުންކުރެވޭ ގޮތަށް ކަމަށެވެ.

އެހެންކަމުން، ބްރިޖު ގޯސްވެގެން އެ ވާހަކަދައްކާނީ މިއަދު ނޫން ކަމަށް ވެސް ރައީސް ޔާމީން ވިދާޅުވިއެވެ.

މުސްތަގުބަލަށް ވިސްނައިގެން ބްރިޖެއް ހަދާއިރު އެތަނުގައި އޮންނަން ޖެހޭނެ ލޭނުގެ އަދަދު ކަނޑައަޅާނީ ސަރުކާރުން ކަމަށާއި ހުންނަން ޖެހޭ ލޭނުގެ އަދަދު ނިންމާނީ ބްރިޖު ހަދަން ހަވާލުކުރާ ކުންފުނިން ނޫން ކަމަށާއި ބްރިޖުގައި އޮންނަން ޖެހޭ ލޭނުގެ އަދަދަކީ ވަކި ވަރެއް ކަމަކަށް ޗައިނާއިން ބުނެފައި ވެސް ނުވާ ކަމަށް ރައީސް ޔާމީން ވިދާޅުވިއެވެ.

އެކަން ކުރާނީ ރައީސް އޮފީހުން ވެސް ނޫން ކަމަށާއި އެކަން ކުރާނީ ޑިޒައިންކުރާ ފަންނުވެރިން ކަމަށާއި އެކަމުގައި އިސްކޮށް އުޅުއްވީ ރައީސް މުއިއްޒު ކަމަށް ރައީސް ޔާމީން ވިދާޅުވި އެވެ. އެހެންކަމުން، ލޭނެއް މަދުވެގެން އެ ވާހަަކަ އަހާނީ ވެސް ރައީސް މުއިއްޒުގެ ގާތުގައި ކަމަށް ރައީސް ޔާމީން ވިދާޅުވި އެވެ.

ރައީސް ޔާމީން ވަނީ ބްރިޖު މަޝްރޫއުއަށް ހަ އަހަރު ފަހުން ލޭނެއް މަދުވެގެން އެ ވާހަކަތައް މިއަދު އަބްދުއްރަހީމް ދެއްކެވުމުގެ ބޭނުމާ ގުޅޭ ގޮތުން ވެސް ސުވާލު އުފައްދަވާފަ އެވެ.