ސަހްޔޫނީންގެ ޕާސްޕޯޓު މަނާނުކޮށް 86 ދުވަސްވެއްޖެއެވެ.

ސަޙްޔޫނީންގެ ޕާސްޕޯޓު މަނާކޮށް އެމީހުންނަށް ރާއްޖެ އެތެރެ ވިޔަ ނުދިނުމަށް ގޮވާލާ ދިވެހި ރައްޔިތުން ރައީސް އޮފީސް ކުރިމަތީ މުޒާހަރާ ކުރުމުން އެދުވަހު ކެބިނެޓުގައި އެކަމާ މަޝްވަރާކޮށް ނޫސްވެރިންގެ ބައްދަލުވުމެއް ބޭއްވިއެވެ. އަދި އެމައްސަލަ އަނބުރާ މަޖިލީހަށް ފޮނުވާލަން ނިންމާފައިވާ ކަމަށް ބުންޏެވެ.


އޭގެ ފަހުން ވެސް މިހާރު 86 ދުވަސް ފާއިތުވެފައިވާއިރު އަދިވެސް ސަހްޔޫނީންގެ ޕާސްޕޯޓާ ގުޅޭ މައްސަލައިގައި ވެރިކަން ކުރާ ޕީއެންސީގެ ސުޕަރ މެޖޯރިޓީ އޮތް މަޖިލީހުން ގޮތެއް ނިންމާފައިނުވެއެވެ. މަޖިލިސް އޮތީ ޗުއްޓީގައެވެ. އެހެން ނަމަވެސް ކުރަންޖެހޭ މުހިންމު ކަމެއް ކުރަން ދައުރުން ބޭރު ޖަލްސާއެއް ބާއްވާކަަށް ފަހެއް ނުޖެހޭނެ ކަމަށް މަޖިލިސް ރައިސް އަދުރޭ ވިދާޅުވިއެވެ.


މިހާރު 86 ދުވަސް ފާއިތުވެގެން ގޮސްފައިވާއިރު އެ ބިލު އެހެން ކޮމިޓީގައި ޕާކުކޮށްފައި ބޭއްވުމަށްފަހު ސަރުކާރުން ވަނީ އެހެން ބިލުތައް އަވަސް މިނުގައި ފާސްކޮށް ނިންމާލާފައިވާކަން ފާހަގަކޮށްލެވެއެވެ.

އަބަދުވެސް ތިބޭނީ ފަލަސްތީނާއެކު ކަމަށް ބުނާ މި ސަރުކާރުން އަދިވެސް ސަހްޔޫނީންގެ ޕާސްޕޯޓު މަނާކުރާ ބިލުގައި އަތްވެސް ޖައްސާނުލާކަން ފާހަގަކޮށްލެވެއެވެ.

މަޖިލިސް ކޮމިޓީ މަރުހަލާގައި އެ ބިލު އޮންނަތާ 80 އެތައް ދުވަހެއް ފާއިތުވެގެން ގޮސްފައިވާއިރު ސަރުކާރުން ވަނީ ބޭރު ދުނިޔެއަށް އެކަމުގެ ހަގީގަތްވެސް އޮޅުވާލާ، ރައީސް މުހައްމަދު މުއިއްޒު ވަނީ ސަހްޔޫނީންގެ ޕާސްޕޯޓު މަނާކޮށްފައިކަމަށް ބުނެ ޚަބަރު ފަތުރާފައެވެ.

ނަމަވެސް ރައީސް މުއިއްޒުގެ ސަރުކާރުން އެ ޕާސްޕޯޓު މަނާނުކުރާއިރު ސަހްޔޫނީން ފަތުރުވެރިންގެ ގޮތުގައި ރާއްޖެ އަންނަ މިންވަރު އެމަނިކުފާނުގެ ދައުރުގެ މިހާ ހިސާބަށް އައިއިރު ވަނީ އިތުރުވެފައެވެ.

އެންމެ ފުރަތަމަ ދީނޭ ވިދާޅުވެ ވެރިކަމަށް ވަޑައިގެން ރައީސް މުއިއްޒު ގެންދަވަނީ އިސްލާމްދީނާ ގުޅުން ހުރި މިފަދަ ކަންކަމުގައި ފަހަތު ފަޔަސް ބުރަވަމުން ކަން ގިނަ ރައްޔިތުން ފާހަގަކުރެއެވެ.

އެގޮތުން އެމްޑީއެންގެ މައްސަލަވެސް ނުބަލާކަން ގިނަ ބަޔަކު ފާހަގަކުރެއެވެ.

ސަހްޔޫނީންގެ ޕާސްޕޯޓު މަނާކުރުމަކީ ރައީސުލްޖުމްހޫރިއްޔާގެ ގަރާރަކުން ކުރެވޭނެ ކަމަކަށްވާއިރު އެ މަގު ޚިޔާރުނުކުރައްވާ ރައީސް މުއިއްޒު އަލުން އެ މައްސަލަ މަޖިލީހާ ޖާމިނުކުރެއްވީ ވެސް ސަހްޔޫނީންގެ ޕާސްޕޯޓު މަނާނުކުރައްވަން "ދިގު" މަގު ޚިޔާރުކުރައްވަންކަމަށް ގިނަ ބަޔަކު ތުހުމަތުކުރެއެވެ.