ފަލަސްތީނުގެ ހައްގުގައި އަޑު އުފުލު ދެ އެންހެނުން ޝަރުތުތަކަކާ އެކު ދޫކޮށްލައިފިއެވެ.

އިޒްރޭލުން ފަލަސްތީނުގައި ހިންގާ ގަތުލްއާންމާ ދެކޮޅަށް އަޑު އުފުލަމުންދަނިކޮށް ބަންދުކުރި އާއިޝަތު ޝާދިޔާ އާއި ޑރ. ޝަޒްރާ އިބްރާހިމް މިއަދު ބަންދުން ދޫކޮށްލަފައިވަނީ، މާލޭގައި ހުންނަ ބޭރުގެ އެމްބަސީތައް ކައިރިއަށް ގޮސް އަޑުނުއުފުލަން ޝަރުތުކޮށެވެ.

ޝާދިޔާއާ ޝަޒްރާ ހައްޔަރުކުރީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، ވަކި ސަފީރަކަށް އުނދަގޫވާ ގޮތަށް އަމަލުކޮށް، ފުލުހުންގެ ވާޖިބަށް ހުރަސް އެޅުމުން ކަމަށް ބުނެ ކޯޓު އަމުރެއްގެ ދަށުންނެވެ.

ބަންދުކުރުމަށް ފަހު ދެ ފަހަރެއްގެ މަތިން މުއްދަތު ޖަހާފައިވެއެވެ. އެގޮތުން ތިން ދުވަހަށާއި ފަސް ދުވަހަށް އެ ދެ މީހުންގެ ބަންދުގެ މުއްދަތު އިތުރުކުރިއެވެ.

ދެވަނަ ފަހަރަށް ޖެހި މުއްދަތު ހަމަވުމާ އެކު މިއަދު ކޯޓަށް އެ ދެމީހުންވެސް ހާޒިރުކުރިއިރު ފުލުހުންގެ ފޯމުގައި އެދިފައި އޮތީ 15 ދުވަހަށް ބަންދު ޖެހުމަށެވެ. ނަމަވެސް، ކޯޓުގައި ފުލުހުން އެދުނީ ޝަރުތު ކުރުމަށްފަހު ދޫކޮށްލުމަށެވެ.

އޯގަސްޓު 28، ގައި ހައްޔަރުކުރި ދެ މީހުން މިއަދު ދޫކޮށްލީ ބަންދުކުރިތާ ނުވަ ދުވަސް ފަހުންނެވެ.

ޝާދިޔާ، 47، އާއި ޝަޒްރާ، 36، ހައްޔަރު ކުރުމުން އެކަން އިދިކޮޅު އެމްޑީޕީ އާއި އަދާލަތު ޕާޓީން ކުށްވެރިކޮށް، އެ ދެ މީހުން ދޫކޮށްލަން ގޮވާލި އެވެ. ނަމަވެސް އެ ބަޔާންތަކާއެކު ސަރުކާރުން ވަނީ ޑިޕްލޮމެޓުންނަށް އުނދަގޫނުކޮށް ފަލަސްތީނަށްޓަކާ އަޑުއުފުލޭނެ ކަމަށް ބުނެ ފުލުހުންގެ އަމަލު ދިފާއުކޮށްފައެވެ.

ޝާދިޔާއާ ޝަޒްރާ ހައްޔަރުކުރުން ބައިނަލްއަގުވާމީ ބައެއް މީޑިއާތަކުގެ ސަމާލުކަމަށް ވެސް އައިސްފައިވެއެވެ.