އަންހެނަކު ރަހީނުކުރުމުގެ ކުށުގައި ހައްޔަރުކުރި ށ. މިލަންދޫ، ހެޕީލޭންޑް، އަހްމަދު އަތުހަރު ފުލުހުންގެ ބެލުމުގެ ދަށުގައި ހުއްޓާ އަމިއްލައަށް މަރުވާން މަސައްކަތް ކުރުމުން ސަލާމަތްކޮށް ހޮސްޕިޓަލްގައި ފަރުވާ ދެމުން ދަނިކޮށް މަރުވުމާ ގުޅިގެން އޭނާގެ ހަށިގަނޑުގެ ޕޯސްޓްމޯޓަމް މާދަމާ ހެދުމަށް ނިންމައިފިއެވެ.

އެކަމަށްޓަކައި އަތުހަރުގެ ހަށިގަޑު މިހާރުވަނީ އިންޑިއާއަށް ގެންގޮސްފައެވެ. މިކަމާ ގުޅޭ ގޮތުން މައުލޫމާތު ހާމަކުރަމުން ފުލުހުން ބުނެފައިވަނީ، އަތުހަރުގެ ހަށިގަނޑު މިއަދު ހެނދުނު އިންޑިއާއަށް ގެންގޮސްފައިވާ ކަމަށެވެ. އަދި މާދަމާ ހަށިގަނޑުގެ ޕޯސްޓްމޯޓަމް ހަދާނެ ކަމަށެވެ.

މިދިޔަ މަހުގެ 29 ވަނަ ދުވަހުގެ ރޭ އަތުހަރުގެ ލޯބިވެރިޔާ ކަމަށް ބުނާ އަންހެން މީހާއަށް ވަޅިން ބިރުދައްކައި އެކި ފަހަރުމަތިން އަތުހަރު ވަނީ އޭނާއަށް އަނިޔާކޮށްފައެވެ. އޭގެ ފަހުން އަތުހަރު ވަނީ އަންހެން މީހާއަށް ވަޅިން ބިރު ދެއްކުމަށްފަހު ސައިކަލުގައި އޭނާ ދާން ބޭނުންވާ ތަނަށް ދިއުމަށް މަސައްކަތްކޮށްފައެވެ. އޭރުވެސް ފުލުހުން ދިޔައީ އަންހެން މީހާ ސަލާމަތްކުރުމަށް އެކި ގޮތް ގޮތުން މަސައްކަތްކުރަމުންނެވެ.

ވަކި ހިސާބަކުން ފުލުހުން ވަނީ ހުށިޔާރުކަމާއެކު އަންހެންމީހާ ސަލާމަތްކޮށްފައެވެ. މިކަމުގެ ތެރޭގައި ދެމީހުންނަށް އަނިޔާވެ ހޮސްޕިޓަލަށް ވަނީ ގެންގޮސްފައެވެ. ނަމަވެސް އަންހެންމީހާއަށް މާބޮޑު އަނިޔާތަކެއް ނުލިބެއެވެ. އަތުހަރަށް ލިބުނު އަނިޔާތަކާ ގުޅިގެން އެންމެފުރަތަމަ އޭނާއަށް ފަރުވާދީފައިވަނީ އޭޑީކޭއަށް ގެންގޮސްގެންނެވެ.

އަންހެން މީހާ ރަހީނުކުރި މައްސަލާގައި އޭގެ ފަހުން ދޫނިދޫގައި ހައްޔަރުކޮށްފައި ހުއްޓާ ޖަލު ގޮޅީގައި އޭނާ ދަންޖެހިފައި އަތުހަރު ހުއްޓާ ފެނުނީ މިމަހުގެ އެއްވަނަ ދުވަހުގެ ރޭ 7:02 ހާއިރު އެވެ. އޭނާ މާލެ ގެނެސް އައިޖީއެމްއެޗްގެ އެމަޖެންސީއަށް ވެއްދުނީ އެ ރޭ 7:25 ހާއިރު އެވެ.

އައިޖީއެމްއެޗްގައި ފަރުވާ ދެމުން ދަނިކޮށް އަތުހަރު މަރުވީ މިމަހުގެ ދެވަނަ ދުވަހުގެ ހަވީރު 4:08 ހާއިރު އެވެ.

އަތުހަރުގެ މަރު، ކަމާ ގުޅުން ހުރި މިނިވަން މުއައްސަސާތަކުން ދަނި ތަހުގީގުކުރަމުންކަމަށް ސަރުކާރުން ހާމަކޮށްފައިވެއެވެ.