މާލޭގެ ގެއެއްގެ ތެރޭގައި ކަރުގައި ވަޅިޖައްސައިގެން ގިނަ އަދަދެއްގެ އިލެކްޓްރޯނިކް ސާމާނު ފޭރުނު މައްސަލައިގައި ހައްޔަރު ކުރި ދެ މީހުންގެ ބަންދަށް ކްރިމިނަލް ކޯޓުން 15 ދުވަސް ޖަހައިފި އެވެ.

ފުލުހުން ވަނީ މި މީހުން ހައްޔަރުކޮށް އެ މީހުންގެ ވަނަވަރުވެސް އާއްމުކޮށްފައެވެ.

އެ މައްސަލައާ ގުޅިގެން ހައްްޔަރުކޮށްފައި ވަނީ މާލެ އަށް ނިސްބަތްވާ އިސްމާއިލް ވިޝާލް 30އ، އާއި ބ. ދަރަވަންދޫއަށް ނިސްބަތްވާ ހުސައިން ޝާފިއު 32އ، އެވެ.

މި ދެ މީހުން ހައްޔަރުކޮށްފައި ވަނީ މާފަންނު ގެއެއްގެ ފާހަނާއަށް ފެންލައިޓުން ވަދެ ކޮޓަރީގައި ނިދާފައި ތިބި ދެ މީހެއްގެ ކަރުގައި ވަޅި ޖައްސައި، އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ ބިރު ދައްކައި، އެ ދެ މީހުންގެ މޯބައިލް ފޯނާއި، ލެޕްޓޮޕަކާއި، އެހެނިހެން ތަކެތި ފޭރުނު މައްސަލައެއްގައެވެ.

މި މައްސަލައިގައި ހައްޔަރު ކުރި ދެ މީހުންގެ ބަންދަަށް މުއްދަތު ޖެހުމަަށް މިއަދު ކޯޓަށް ހާޒިރު ކުރުމުން ދެ މީހުންގެ ބަންދަަށްވެސް 15 ދުވަސް ވަނީ ޖަހައިފައެވެ.