ކައުންސިލްގެ ހުއްދައާ ނުލާ ތ. ތިމަރަފުށި އަތިރިމަތިން ވެލި ކޮނެ ނެގި މައްސަލައެއް ފެންމަތިވެއްޖެއެވެ.

މިކަމާ ގުޅިގެން ތޭރަ އޮންލައިނަށް މައުލޫމާތު ދެއްވަމުން އެ ރަށު ކައުންސިލް މެމްބަރު އަލީ ޝާހު ވިދާޅުވީ، އާންމުންގެ މީހަކު ކުރި ރިޕޯޓަކާ ގުޅިގެން އޭނާ މިއަދު ސީނަށް ދިޔައިރު ތިމަރަފުށީގައި ބޮޑު ހިލަ ޖެހުމުގެ މަޝްރޫއު ކުރިއަށް ގެންދާ ކުންފުނި، ސާސި ކުންފުނިން އެ މަޝްރޫއުގެ ޓްރާންސްޕޯޓު ހަވާލުކޮށްފައިވާ ލިއޯ ޓްރޭޑިންގެ ބާޖެއް އައިސް ތިމަރަފުށި އަތިރިމަތި ސަރަހައްދުން ވެލި ކޮނެގެން ނަގަމުން ދިޔަ ކަމަށާ ދެ ތަނަކުން ވެލި ނަގާފައިވާ ކަމަށެވެ.

ޝާހު ވިދާޅުވީ ކައުންސިލްގެ ހުއްދައަކާ ނުލާ މި ފަދަ ގޮތަކަށް އަމަލުކުރުމުން ރަށުގައި ހުރި ސާސި ކުންފުނިޣެ ސައިޓަށް ގޮސް ސައިޓު މެނޭޖަރަކަށް ހުރި އިންޑިއާ ރައްޔިތަކާ ސުވާލުކުރުމުން ބުނެފައިވާ ގޮތުގައި ހުއްދަ ނަގަން ެޖހޭކަން އެނގިފައި ނުވާ ކަމަށެވެ.

ޝަހު ވިދާޅުވީ، ރާޅު ޖަހާ ހިސާބުން ވެލި ނަގާފައިވަނީ އެ އަތޮޅު ކަނޑޫދޫގައިވެސް ބޮޑު ހިލަ ޖެހުމުގެ މަސައްކަތް ހަމަ ކުންފުންނިން ކުރަމުންދާ ސަރަހައްދަށް ހިލަތައް އުފުލުމަށް ހިލަ ބާޖަށް އެރުވުމަށް، ބާޖަށް ވެލި އެޅުމަށެވެ.

ޝާހު ވިދާޅުވީ އިންޑިއާ މީހާއަށް ހުއްދަ ނަގަން ޖެހޭކަން ނޭނގުނު ނަމަވެސް އެއީ ގަވާއިދާ ޚިލާފަށް ކުރިކަމަކަށްވުމުން މިހާރު ރަސްމީކޮށް މައްސަލަ ފުލުހަށް ހުށަހަޅާފައިވާނެ ކަމަށާ އަދި މިހާރު ކައުންސިލްގެ ފަރާތުން މައްސަލައިގައި އިސްކޮށް ހަރަކާތްތެރިވަނީ ކައުންސިލް ރައީސް ކަމަށެވެ.