20 ވަނަ ރައްޔިތުންގެ މަޖިލީހުގެ އިންތިހާބުގެ ތިމަރަފުށީ ދާއިރާއަށް ޕްރޮގްރެސިވް ކޯލިޝަނުން ކެންޑިޑޭޓަކު އައްޔަންކޮށްފައިވަނިކޮށް، ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތާއީދު އެހެން ބޭފުޅަކަށް ދެއްވާފައިވާކަން ހާމަވާ ވީޑިއޯއެއް ދައުރުވާން ފަށައިފިއެވެ.

އެގޮތުން ތިމަރަފުށީ ދާއިރާއަށް ޕީޕީއެމް /ޕީއެންސީގެ ޓިކެޓުގައި ވާދަކުރައްވާނީ ޕީޕީއެމްގެ ސެނެޓާރ އަދި ރިޔާސީ އިންތިހާބުގައި ރައީސް މުއިއްޒުގެ ޕީއޭގެ ގޮތުގައި ގިނަ އަދި ބުރަ މަސައްކަތްތަކެއް ކޮށްފައިވާ ތ. ތިމަރަފުށީ/ނިޝާން، އިބްރާހިމު ސަނާހު (ސަންޓޯ) ކަމަށް އެކޯލިޝަންއިން ނިންމާ ވަނީ އޭނާއަށް ޓިކެޓޫ ވެސް އަރުވާފައެވެ.

ނަމަވެސް އޭގެ 3 ދުވަސް ފަހުން ސޯޝަލް މީޑިއާގައި ދައުރުވާން ފެށީ ވީޑިއޯއަކުން ފެނިގެން ދަނީ ރައީސް އޮފީހުގެ ދެ މިނިސްޓަރުން ކަމަށް ވާ އާދަމް ރަމީޒުއާ އަބްދުﷲ ނާސިރު (ހެރިންސް އައްޅޯ) ތިމަރަފުށީ ބަޔަކާއެކު ބައްދަލުވުމެއްގައި ތިއްބަވާ މަންޒަރެވެ. އެ ބައްދަލުވުމުގައި މިހާރުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ވެސް އިންނަވައެވެ.

އެ ބައްދަލުވުމުގައި ރަމީޒު އާ ނާސިރުއާ ވިދާޅުވާ އަޑު އިވިގެން ދަނީ ރައީސް މުއިއްޒު ވަނީ އެމަނިކުފާނުގެ ތާއީދު އަބްދުﷲ ރިޔާޒުގެ ބޭބެ އަހުމަދު ރިޔާޒަށް ދޭން ނިންމާފައި ކަމަށާ އަދި އެ ދެބޭފުޅުންގެ ސަމާލުކަމަށް ރައީސް މުއިއްޒު އެކަން ގެންނަވާފައިވެސް ވާ ކަމަށެވެ.

މިނިސްޓަރު ރަމީޒުގެ ވާހަކަ ނިންމާލުމުން މިނސްޓަރު ނާސިރުވެސް ވަނީ "ކުރަންޖެހޭ ހުރިހާ ކަމެއް" ކުރަން ރައީސް އަންގަވާފައިވާ ކަމަށާއި އެކަން އެގޮތަށް ކުރައްވާނެ ކަމަށެވެ.

މިކަމާ ގުޅިގެން ސަނާހުގެ ބަހެއް ހޯދާލަން ޗެނަލް13 އިން ކުރި މަސައްކަތުން ސަނާހު ވިދާޅުވީ، އަދި އޭނާއަށް މިކަމުގައި ޕީޕިއެމް/ޕީއެންސީ ލީޑަރޝޕުން އިތުރު އެންގުމެއް އަންގާފައިނުވާ ކަމަށާ ފެބްރުއަރި ފަސް ވަނަ ދުވަހު ގަރާރުވެސް ހަވާލުކޮށްފައިވާ ކަމަށެވެ.

ނަމަވެސް ސަނާހު ވިދާޅުވީ މކި ފަހަރު ކޮޅުމަޑުލަށް ރައީސް މުއިއްޒު ވަޑައިގެންނެވި ދަތުރުގެ ދައުވަތު ލިބިފައި ނުވާ ކަމަށާ އެކަމާ ސުވާލު އުފެދުނު ކަމަށެވެ. އޭނާ މިހާރު އިންތިޒާރު ކުރަނީ ސީދާ ރައީސް މުއިއްޒުގެ ބަސްފުޅަކަށް ކަމަށް ވެސް ސަނާހު ވަނީ ވިދާޅުވެފައެވެ.

ސަނާހު މި ވަގުތު ވެސް ހުންނެވީ ދާއިރާގައި ކެމްޕެއިންއަށް ވަޑައިގެންނެވެ.

ސަނާހުއަކީ ނިމިދިޔަ ރިޔާސީ އިންތިހާބުގައި އިދާރީ ގޮތުންނާ އަދި އަމަލީ ގޮތުންވެސް ރައީސް މުއިއްޒު ހޮއްވެވުމަށް ގިނަ ބުރަ މަސައްކަތްތަކެއް ކުރި ބޭފުޅެކެވެ. އެގޮތުން އޭނާ ވަނީ ރައީސް މުއިއްޒު އަރިހު ކެމްޕެއިންގެ ހުރިހާ ދަތުރުތަކެއްހެން ބައިވެރިވެވަޑައިގެންފައެވެ. އަދި ކެމްޕެއިންގެ ހުރިހާ ކަމެއް ކުރިއަށް ގެންދިޔައީވެސް ސީދާ ސަނާހުގެ ބެލުމުގެ ދަށުންނެވެ.

މިފަދަ ކަމެއް ފެންމަތިވެފައިވާއިރު ނިމިދިޔަ ޕްރައިމަރީގައި ތައްޔާރީތަކުގައިވެސް ވަކި ވަކި ކެންޑިޑޭޓުން އައްޔަންކޮށް އެހެންކެންޑީޑޭޓުން ބާކީ ކުރަން ފެށި މައްސަލަވެސް ދިމާވެ ބައެއް ކެންޑިޑޭޓުންނަށް ނަން އަނބުރާ ނެގުމަށް ވެސް އަންގާ ހަމަނުޖެހުންތަކެއް އުފެދުނެވެ. އޭގެ ފަހުން ޕާޓީއިން ގިނަ ބަޔަކު ކެނޑެން ފެށުމުން ވަނީ މެމްބަރުން ހިފެހެއްޓުމަށް، ޕްރައިމަރީ ބާއްވާފައެވެ.

ހަމަ އެހެންމެ މި އިންތިހާބުގައި ހޮވާ ގިނަ ދާއިރާތަކަށް ޕީއެންސީއިން ކެންޑިޑޭޓުން ނެރޭއިރު، ބައެއް ދާއިރާތަކަށް ޕީއެންސީގެ ޓިކެޓު ހޯދި ފަރާތްތަކުގެ ބަދަލުގައި ރައީސް މުއިއްޒު ވަކި ކެންޑިޑޭޓުންތަކެއް ނެރެމުންދާ ކަމުގެ އަޑުތައް ސޯޝަލް މީޑިއާގައި ވަނީ ގަދަވެފައެވެ.