ބޭންކޮކްގެ ހޮޓަލެއްގައި ނިޔާވެފައި އޮއްވާ ފެނުނު ދިވެހި ޒުވާނާ އޮތީ މަރާލާފައިކަން ތޭރަ އޮންލައިނަށް މައުލޫމާތު ލިބިއްޖެއެވެ.

ތައިލެންޑުގެ ހޮޓަލެއްގައި މަރުވެފައި އޮއްވާ އެގައުމުގެ ފުލުހުންނަށް ފެނުނު ދިވެއްސަކީ ތ. ތިމަރަފުއްޓަށް ނިސްބަތްވާ ޒުވާނެެކވެ. އެގޮތުން އެ ރަށު ލުނބޯމާގެ، މުއާވިޔަތު މޫސާ (30އ) ނިޔާވެފައި އޮއްވާ ފެނުނީ ވެސް އޭގެ އެއް ދުވަސް ފަހުން ކަމަށް މައުލޫމާތު ލިބިފައިވެއެވެ.

މިކަމާ ގުޅިގެން "ތޭރަ އޮންލައިނަށް" މައުލޫމާތު ދެމުން މުއާވިއަތުގެ ގާތް މީހަކު ކިޔައިދިފައިވާ ގޮތުގައި މުއާވިއަތުއަކީ މަސްތުވާ ތަކެތީގެ ވަބާގައި ޖެހިފައިވާ ޒުވާނެއް ކަމަށާ އަދި އޭނާ އެއްވެސް ވަޒީފާއެއް އަދާނުކުރާ ކަމަށެވެ.

އޭނާ ތިމަރަފުށިން ފުރަތަމަ ފުރަން ދިޔަ ދުވަހު ގަޑި އޮޅިގެން އޭނާ ޗެކިންއަށް ދިޔައީ ފްލައިޓު ފުރަން އިން ގަޑިއަށް ކަމަށްވުމުން އެ ދުވަހު އޭނާއަށް ތިމަރަފުށިން ފުރޭ ގޮތް ނުވި ކަމަށާ ނަމަވެސް އަނެއްކާވެސް އޭގެ ފަހުން އޭނާ ތިމަރަފުށީން މާލެ އައީ މޯލްޑިވިއަންގެ ފްލައިޓެއް ކަމަށެވެ.

ނަމަވެސް ވަޒީފާއަށް ނުދާ މީހަކު އަދި ރަށުގައި އުޅުނުއިރު ކޮފީއެއް ބޯލަންވެސް ރުފިޔާއެއް ނޯންނަ މީހަކު ފްލައިޓުގައި ތިމަރަފުށިން މާލެ ދިއުމުން އާއިލާއަށް ޝައްކު އުފެދި އެކަމުގައި އެހެން ބައެއްގެ ބައިވެރިވުން އޮތްކަމަށް ތުހުމަތު ކުރެވުނުކަމަށެވެ.

އެގޮތުން ބެލި ބެލުމުން ހާމަވެފައިވާ ގޮތުގައި މުއާވިއަތުގެ ޓިކެޓަށް ތިމަރަފުށިން ފުރުމަށް ދެ ފަހަރުވެސް ކޮށްފައިވަނީ ބޭންކް ޓްރާންސްފަރ ކަން ތޭރަ އޮންލައިނަށް ވަނީ ކަށަވަރުވެފައެވެ. އަދި ޓްރާންސްފަރ ކޮށްފައިވަނީ އަންހެންނެއްގެ ނަމުގައި ހުޅުވާފައިވާ އެކައުންޓަކުންކަންވެސް ތޭރަ އޮންލައިނަށް ކަށަވަރުވެފައިވެއެވެ.

މުއާވިއަތުގެ މަރުގެ ޚަބަރު ދިވެހި ޚާރިއްޖާއިން އާއިލާއާ ހިއްސާކުރުމުން މުއާވިއަތުގެ ފޮޓޯއެއް ފޮނުވައިދިނުމަށް އޭނާގެ މަންމަ އާ ބައްޕަ އެދުމުން ޚާރިއްޖާއިން ފޮނުވި ފޮޓޯތަކުން ހާމަވާ ގޮތުގައި މުއާވިއަތުގެ ވައަތު ފަޔާ އަތާ ކަންފަތްވެސް ނެތެވެ. އާއިލާއިން ތުހުމަތުކުރާ ގޮތުގައި އެ ގުނަވަންތައް ވަނި ބުރިކޮށްލާފައެވެ.

މުއާވިއަތުގެ މަންމަ ތަކުރާރުކޮށް ފޫޅުން މަތީގެ ފޮޓޯއެއް ފޮނުވުމަށް އެދުމުން ޚާރިޖިއްޔާއިން ފޮނުވި ފޮޓޯތަކުން އޭނާގެ ކަރުގައި ތޫނު އެއްޗަކުން އަޅާފައި ހުރިކަން ހާމަވާ ކަމަށްވެސް ތޭރަ އޮންލައިނަށް މައުލޫމާތު ދީން މީހާ ވަނީ ކިޔައިދީފައެވެ. އަދި ފޮޓޯ ޒޫމްކޮށްލުމުން އޭނާގެ މޫނުގައިވެސް ތޫނު އެއްޗަކުން ހަމަލާދީފައި ހުރި ނިޝާންތައް ފެންނަން ހުރިކަމަށް ވެސް މައުލޫމާތު ދީފައިވެއެވެ. ނަމަވެސް އެކަމާ ގުޅިގެން އާއިލާއިން ޚާރިޖިއްޔާގެ އޮފިޝަލުންނާ ސުވާލުކުރުމުން ދިފައިވާ ޖަވާބަކީ އެއީ މީހާ ގަނޑުވެފައި އޮތުމުން މޯސްޓު މޯޓަމް ގެދިއިރު ލިބިފައި ހުރި ގެއްލުންތަކެއް ކަމަށެވެ.

އާއިލާއިން ވަނީ މުއާވިއަތު މަރުވެފައި އޮއްވާ ފުރަތަމަ ފެނުނު ތަނުގެ މަންޒަރު ފެންނަ ފޮޓޯ ހިއްސާކުރުމަށް ވެސް އެދިފައެވެ. ނަމަވެސް ޚާރިޖިއްޔާއިން ބުނެފައިވާ ގޮތުގައި ފޮރެންސިކުގެ ބޭނުމަށް ނެގި ފޮޓޯތައް ހިއްސާކުރެވެން ނެތް ކަމަށެވެ. އަދި ގުނަވަންތައް ބުރިކޮށްލާފައި ހުރި ހުރުމާ ގުޅިގެން އާއިލާއިން ސުވާލުކުރުމުން މައުލޫމާތު ދޭން ފަހުން ގުޅާނެ ކަމަށް ބުނި ނަމަވެސް އަދި އޭގެ ފަހުން އާއިލާއަށް ޚާރިޖިއްޔާއިން މައުލޫމާތު ހިއްސާކޮށްފައިނުވާ ކަމަށެވެ.

އެހެންކަމުން އާއިލާއިން ބުނާ ގޮތުގައި ބަޔަކު ރާވައިގެން މުއާވިއަތު ބޭންކޮކަށް ގެންގޮސް މަރާލީއެވެ. ނަމަވެސް ސަބަބު ބުނެދޭން އާއިލާއަށް ވެސް ނޭނގޭ ކަމަށްވެއެވެ.

މުއާވިއަތުގެ މަރުގައި ޝައްކުވާ ކަންތައްތަކެއް ހުރުމުން މުއާވިއަތުގެ ހަށިގަނޑުގެ ޕޯސްޓު މޯޓަމް ވަނީ ހަދާފައެވެ. ޕޯސްޓު މޯޓަމް ރިޕޯޓް ލިބެން އަދި ތިން ހަފްތާ ނަގާނެ ކަމަށް ރާއްޖޭގެ ފޮރިން މިނިސްޓްރީން މުއާވިޔަތުގެ އާއިލާއަށް އަންގާފައިވެއެވެ.

މުއާވިއަތުގެ ހަށިގަނޑު މިހާރުވަނީ ތައިލެންޑްގައި ވަޅުލާފައެވެ.

މުއާވިއަތުގެ މަރުގެ މައްސަލައިގައި ދިވެހި ފުލުހުންގެ ތަރުޖަމާނު އަހުމަދު ޝިފާން ތޭރަ އޮންލައިނަށް ވިދާޅުވީ، އެކަން ހިނގާ ދިޔަ ގޮތް ހޯދުމަށް ފޮރިން މިނިސްޓްރީއާ ތައިލެންޑް ފުލުހުންނާ ގުޅިގެން ދިވެހި ފުލުހުން ކުރަމުން ގެންދާ ކަމަށެވެ. ޚާރިޖީ ވުޒާރާގެ ބަހެއް ހޯދާލަން ކުރި މަސައްކަތް އަދި ވަނީ ކާމިޔާބުވާ ގޮތް ނުވެފައެވެ.