މިއަހަރުގެ ޖުލައިމަހުގައި ހުޅުމާލޭ ފޭސް ދޭއްގައި ހިނގި އެކްސިޑެންޓުގައި ކާރު ދުއްވަން އިން އިބްރާހިމް އިކްރާމުގެ ބަންދަށް އިތުރު 30 ދުވަސް ޖަހައިފިއެވެ.

ހުޅުމާލެ ފޭސް 2 ގައި، ވިނަރެސް ފުލެޓުތައް ކައިރީގައި ހިނގި އެ އެކްސިޑެންޓު ހިނގީ އިކްރާމު ދުއްވަން އިން ކާރު ކޮންޓްރޯލުން ނެއްޓިގެން ގޮސް މަގުގެ އެއްފަރާތުގައި މަޑުކޮށްގެން ސައިކަލެއްގައި އިން މީހެއްގެ ގައިގައި ޖެހިގެންނެވެ.

އެ މައްސަލައިގައި އިކްރާމު ހިމެނޭހެން ޖުމުލަ ތިން މީހަކު ފުލުހުން ހައްޔަރު ކުރިއެވެ. އެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ގެންދިޔުމުން އޯގަސްޓު 1، ގައި އަމުރު ކުރީ އެ މައްސަލައިގެ ޝަރީއަތް ނިމެންދެން އެ ތިން މީހުން ވެސް ބަންދު ކުރުމަށެވެ. ނަމަވެސް އެ މައްސަލައިގައި ފުލުހުން އަމަލު ކޮށްފައި ވަނީ ގާނޫނުއަސާސީއާ ހިލާފަށް ކަމަށް ކަނޑައަޅައި މިދިޔަ އާދީއްތަ ދުވަހު ހައި ކޯޓުން ވަނީ ދަށު ކޯޓުގެ އަމުރު ބާތިލުކޮށްފަ އެވެ.

ކޯޓުން އެގޮތަށް ހުކުމް ކުރީ ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރު ކުރިއިރު، ގާނޫނީ ވަކީލަކު ހަމަޖެއްސުމުގެ ފުރުސަތު ފުލުހުން އިކްރާމަށް ދީފައި ނުވާތީ ކަމަށް ބުނެއެވެ.

ނަމަވެސް އެއާ ވިދިގެން އައި ހޯމަ ދުވަހު އިތުރު ކޯޓު އަމުރެއްގެ ދަށުން ފުލުހުން އަނެއްކާވެސް އިކްރާމު ހައްޔަރު ކުރިއެވެ. އަދި ކޯޓުން 3 ދުވަހުގެ މުއްދަތެއް ޖެހިއެވެ. އޭގެ ފަހުން ބަންދުގެ މުއްދަތު ޖެހުމަށް މިއަދު ކޯޓަށް ހާޒިރުކުރުމުން ކޯޓުން ވަނީ އިކްރާމުގެ ބަންދަށް 30 ދުވަސް ޖަހާފައެވެ. މިކަން ފުލުހުން ވަނި މީޑީޔާތަކަށް ފޮނުވި މެސެޖެއްގައި ކަށަވަރުކޮށްދީފައެވެ.