ހޯއްގޮވާ ގެއްސުން ބައްޔަށް އަނެއްކާވެސް ކުޑަ ކުއްޖަކު ފައްސިވެއްޖެއެވެ.

ގއ. ވިލިނގިލިން ޕަޓޫސިސް ނުވަތަ ހޯއްގޮވާ ކެއްސުން ބައްޔަށް ތިން ކުއްޖަކު ޕޮޒިޓިވް ވެފައި ވަނިކޮށް އިތުރު ކުއްޖަކަށް ވެސް އެ ބަލި ޖެހިފައިވާ ކަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ހާމަކޮށްފައެވެ.

މިކަމާ ގުޅިގެން އެޗްޕީއޭއިން އެ ބައްޔަށް އިތުރު ކުއްޖަކު ޕޮޒިޓިވްވެފައިވާ ކަމަށެވެ. އަދި މިއީ ކުރީން ފެނުނު ކޭސްތަކާއި ގުޅުން ހުރި ކޭހެއް ކަމަށް ނުބެލެވޭ ކަަމަށެވެ. 

ރާއްޖޭގައި ކޮންޓްރޯލުކުރެވިފައިވަނިކޮށް ފެތުރެން ފަށާފައިވާ މިބަލީގެ ކަންކަމުގައި އެޗްޕީއޭއިން ހާމަކޮށްފައިވާ ގޮތުގައި ބަލިފެތުރުން ހުއްޓުވަން ގއ އަތޮޅު ހޮސްޕިޓަލް ގައި ޓާސްކުފޯހެއް އެކުލަވާލާ ކޮންޓެކްޓް ޓްރޭސިންނާއި ކޮންޓެކްޓުންގެ ތެރެއިން އަލާމަތް ހުރި މީހުންނަށް ބޭސް ދިނުމާއި ހަތް އަހަރުން ދަށުގެ ކުދީންގެ ތެރެއިން ވެކްސިން ފުރިހަަމަ ނުކުރާ ކުދީން ދެނެގަތުމުގެ މަސައްކަތް ދަނީ ކުރަމުންނެވެ.

ހޯއްގޮވާ ކެއްސުން ބައްޔަށް ތިން ކުއްޖަކު ޕޮޒިޓިވް ވެފައިވާ އެޗްޕީއޭ އިން ހާމަކުރީ މި މަހުގެ 23 ވަނަ ދުވަހުއެވެ.

އެޗްޕީއޭއިން ހާމަކޮށްފައިވާ ގޮތުގައި ބަލި ޖެހުމުން ނުރައްކާ ބޮޑީ ވަރަށް ތުއްތު ކުދިންނަށް ކަމަށެވެ. އެހެންކަމުން ހަތް އަހަރު ނުވާ ކުދިން ވެކްސިންގެ ޑޯޒްތައް ފުރިހަމަ ނުކުރާ ކުދިން ވީހާވެސް އަވަހަށް ވެކްސިން ފުރިހަމަ ކުރުމަށް އެ އޭޖެންސީން އިލްތިމާސްކުރެއެވެ. ކޮންމެ ރަށެއްގެ ސިއްހީ މަރުކަޒަކުން ވެކްސިން ޖެހޭނެކަމަށްވެސް ހާމަކޮށްފައިވެއެވެ.

ހަމަ އެހެންމެ ރޯގާޖެހި ކެއްސާ މީހުންގެ ތެރެއިން، ކެއްސުން ދިގުލައިގެންދާ ނަމަ ނުވަތަ ކެއްސުމުގެ ސަބަބުން އުނދަގޫތަކެއް ދިމާވާނަމަ ނުވަތަ ދިގު މުއްދަތަކަށް ފަރުވާ ކުރާ އެހެން ބައްޔެއް ހުރި ނަމަ ނުވަތަ ތުއްތު ކުއްޖެ ނުވަތަ މާބަނޑު މީހަކު ނަމަ ލަސްނުކޮށް ސިއްހީ ޚިދުމަތްތެރިއެއްގެ ލަފާ ހޯދުމަށް އެޗްޕީއޭއިން ވަނީ އިލްތިމާސްކޮށްފައެވެ.

ހޯއްގޮވާ ކެއްސުން ބަލި ފެތުރެނީ ނޭވާލާ ނިޒާމުގެ ޒަރީއާއިންނެވެ. އެ ބަލި ޖެހުމުން ފުރަތަމަ ފެންނާނޯ އާންމު ރޯގާތަކުގައިވެސް ފެންނަ އަލާމާތްތަކެވެ. މީގެ އިތުރުން ހަފުތާއެއްހާ ދުވަސް ފަހުން ވަރަށް ބޮޑަށް ކެއްސާ، މި ކެއްސުން ގިނަ ދުވަހަށް ދިގުލައިގެންދެއެވެ.