ހަނދާނަށް އަންނަނީ ރިޔާސީ އިންތިޚާބްގެ ކެމްޕެއިން ދުވަސްވަރެވެ. 2023 ވަނަ އަހަރުގެ ސެޕްޓެމްބަރު 16 ވަނަ ދުވަހު އޭރުގެ ޕީޕީއެމް/ޕީއެންސީގެ ކެންޑިޑޭޓް އަދި މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްކެވި ވާހަކަފުޅަކަށް އަލިއަޅުވާލާނަމެވެ.

ނިމިދިޔަ ރައީސް އިބްރާހިމް މުހައްމަދު ޞާލިހްގެ ސަރުކާރުން ނަގާފައިވާ ލޯނުތައް އަނބުރާ ދެއްކުމަށް އެކުވެރި ބައެއް ގައުމުތަކުން މިހާރު ވެސް ފެހި ސިގްނަލް ލިބިފައިވާ ކަމަށް މުއިއްޒު ވިދާޅުވި އިރު ެ ވާހަކަ މުޅި ގައުމަށް އަޑުއިވުނެވެ. ރައްޔިތުންގެ ހަނދާނުން ކައްސާ ނުލާނެކަން ޔަގީނެވެ. އެއީ ރާއްޖޭގެ އުތުރަށް ވަޑައިގެން ހދ. ކުރިނބީ ރައްޔިތުންނާ ބައްދަލުކުރައްވާ ނިކަން ޔަގީންކަމާއެކު އަޑަށް ބާރުލައިފައި ވިދާޅުވީ ދައުލަތުގެ ކަންކަން ކުރެވޭ ވަރަށް ދައުލަތަށް ފައިސާ ވަންނަމުން ދާކަމުގެ ވާހަކައެވެ.

ފެހި ސިގްނަލޭ ވިދާޅުވެ ސިގްނަލްގެ ވާހަކަ ފެއްޓެވީ އާދެ އެ ބޭފުޅާއެވެ.މިއަދު އެވާހަކަ ދެއްކެވިތާ އަހަރެއްވާން ކައިރިވެރިވެފަވާއިރު ލޯނުދެއްކުމަށް ފައިސާ ދިން ގައުމެއް އަދި ދޭނެ ކަމަށް ބުނި ގައުމެއް ނެތެވެ. ލަދުން ބޯ ހަލާކުވީ ދިވެހި ރައްޔިތުންނެވެ. އެހެންތާވާނީ ވޯޓު ދެއްވި ސަބަބުތަކުގެ ތެރެއިން މި ވެރިޔާ ދެއްވި "ގްރީން ސިގްނަލް" ގެ ސަބަބުވެސް ހިމެނޭތީއެވެ.

އޭރު އެ ވިދާޅުވި ފެހި ސިގްނަލް ވީ ދިޔައީ ހަވަޔަށް ކަމެއް ނުވަތަ ބިންފަޅާފަ އަޑިއަށް ކަމެއްވެސް ނޭނގެއެވެ. ނަގާކޮޅަށް ޖަހާނެ ކަމަށް ވިދާޅުވި އިގްތިޞާދުގެ ޒިންމާ ނުނެގި ފެއިލްވާ މަންޒަރު ފެންނަމުން ދާތީ "ލެޓްސް ބްލޭމް އިޓް އޮން ކުރީ ސަރުކާރުު" ކިޔާ އަތުކުރި އޮޅާލިއެވެ.

މި ސަރުކާރު ފެށުނީ "ގްރީން ސިގްނަލް" ގެ ސަކަރާތަކުންނެވެ. ނަމަވެސް މިއަދު ސިގްނަލަކީ މިވެރިން ދަންނަ އެއްޗެއް ވެސް ނޫނެވެ. އާދެ މި މަހުގެ 3 ވަނަ ދުވަހު ފޮރިން އިންވެސްޓްމެންޓްގެ ޤާނޫނު ވުޖޫދުވުމާއި އެކު ރައީސް އޮފީހުގައި އޮތް ނޫސްވެރިންގެ ބައްދަލުވުމަށް އަލިއަޅުވާލާނަމެވެ.

އެދުވަހު ނޫސްވެރިޔަކު ފޮރިން އިންވެސްޓަރުންގެ ފެހި ސިގްނަލް ލިބިފަވޭތޯ ކުރި ސުވާލަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވީ މި ސަރުކާރަކީ ކުލަ ކުލައިގެ ސިގުނަލް ދޭ ސަރުކާރެއް ނޫން ކަމަށެވެ. އަސްތާ، މިހާރު ސިގްނަލަކީ ކޯއްޗެއް ކަމެއް ވެސް ނޭނގެއެވެ.އެ ދުވަހު ދެއްވި ސިގްނަލް އަކީ ފެހި ސިންގަލް ކަމަށް ވިޔަސް މިއަދު އެޔޮތީ ރަތް ސިގްނަލްއަކަށް ވެފައެވެ.

ފެހި ސިގްނަލްގެ ހިޔަލުގައި ތިއްބާ ގައުމުގެ ދަރަނި އަރަނިކުރުން ތަކުލީފަކަށްވެ ސަރުކާރު ނޭވާހޮޅިއަށް އެޅެނީއެވެ. ސަރުކާރުން މިއުޅެނީ ސިގްނަލޭ ކިޔާފައި ރައްޔިތުން ބޮއްވާށެވެ. ފެއްސެއް ރަތެއް ވަތްކެއް ނުވެއެވެ. ސަރުކާރުގެ ވެރިންގެ ތެރެއިން ތިބީ ހުސް "ކަލަރ ބްލައިންޑް" މީހުން ނޫންކަމެއް ވެސް ނޭނގެއެވެ.

ކޮޅު ކޮޅުން ލިބެމުން އައި ސިގްނަލް ގިނަކަމުން ސިގްނަލްގެ ވާހަކަތަކަށް މި ޖެހީ ފުލުސްޓޮޕެއް!