ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަޒުލުކުރަން އެމްޑީޕީއިން އަނެއްކާވެސް މަސައްކަތް ފަށައިފިއެވެ.

މިކަން ރަސްމީ ގޮތެއްގައި މަޖިޅީހުގެ މެޖޯރިޓީއިން ހާމަނުކުރި ނަމަވެސް އެ ޕާޓީގެ ބައެއް މެމްބަރުން ގެންދަނީ މި ވާހަކަތައް ހިއްސާކުރަމުންނެވެ.

އެގޮތުން އެ މެމްބަރުން ހާމަކޮށްފައިވާ ގޮތުގައި ރައީސް ޑރ. މުއިއްޒު މަގާމުން އަޒުލު ކުރުމުގެ މައްސަލަ މަޖިލީހަށް ހުށަހަޅަން ބޭނުންވާ ސޮއި މިހާރުވަނީ ހަމަވެފައެވެ.

ނަމަވެސް ސޮއި ކުރީ ކިތައް ބޭފުޅުން ކަމެއް ސާފެއް ނުވެއެވެ. އެނގިފައިވާ ގޮތުގައި އެކަމަށް ބޭނުންވާ ސޮއި ހަމަކުރީ ދަ ޑިމޮކްރެޓްސްއަށް ނިސްބަތްވާ މެންބަރުންނާއެކުއެވެ. އަދި މިހާތަނަށް 34 މެމްބަރަކު އެ ގަރާރުގައި ސޮއި ކޮށްފައިވާކަމަށް ވެސް އެ މެމްބަރުން މިހާރުވަނީ ހާމަކޮށްފައެވެ.

ރައީސް އަޒުލު ކުރުމުގެ ގަރާރު ރައްޔިތުންގެ މަޖިލީހަށް ހުށަޅަން 26 މެންބަރެއްގެ ސޮއި ބޭނުންވާއިރު އިތުބާރު ނެތްކަމުގެ ވޯޓު ފާސްކުރަން މަޖިލީހުގެ 4 ބައި ކޮށްފައި 3 ބައި ވޯޓު ބޭނުންވާނެއެވެ. އެއީ 65 މެމްބަރުންގެ ވޯޓެވެ. ނަމަވެސް އެމްޑީޕިއާ ޑިމޮކްރެޓްސް އެއްކުރި ނަމަވެސް މިހާރު މަޖިލީގައި އެ އަދަދު ހަމަނުވެއެވެ.

އެމްޑީޕީގައި 44 މެމްބަރުންނާ ޑިމޮކްރެޓްސްގައި 13 މެމްބަރުން ތިބިއިރު ޖުމްލަ ވާނީ 57އެކެވެ.

ރައީސް ޑރ. މުއިއްޒު އަޒުލުކުރަން މަސައްކަތް އަނެއްކާވެސް ފަށާފައިވާކަމުގެ އަޑުތައް ގަދަވެފައިވާއިރު މީގެ ކުރިންވެސް އެ މައްސަލަ ހުށަހަޅާފައިވެއެވެ.

ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބު އަޒުލުކުރުމަށް ރައްޔިތުންގެ މަޖިލިހުގައި އަމަލު ކުރުމަށް މަޖިލިސް ގަވާއިދުގައި އެކަށައަޅާފައިވާ އުސޫލުތަކަށް ލުއިގެނެސް، އެކަމާއި ގުޅުހުރި މާއްދާތައް އިސްލާހުކޮށް ކުރުމަށް އިސްލާހުވެސް އެމްޑީޕީއިން ހުށަހަޅާފައިވެއެވެ. އަދި މި އިސްލާހު ފާސްވެއްޖެ ނަމަ މިހާރު އެމްޑީޕީގައި އޮތް މެޖޯރިޓީއާއެކުވެސް ރައީސް މުއިއްޒު އަޒުލުކުރެވޭނެއެވެ.