ނިމިދިޔަ ހަފްތާގެ ބުދަ ދުވަހު މަނީ ލޯންޑަރިންގެ ތުހުމަތުގައި ގިނަ އަދަދެއްގެ ޑޮލަރުތަކަކާއެކު ހައްޔަރުކުރި އިންޑިއާ މީހާގެ ބަންދުގެ މުއްދަތު 10 ދުވަހަށް އިތުރުކޮށްފި އެވެ.

ކްރިމިނަލް ކޯޓުން އާންމުކުރި ކޯޓު އަމުރުގައިވާ ގޮތުން އެ މައްސަލާގައި ހައްޔަރުކުރި ރަގޫބް ނިސްތާރު ހަލީމް ރަހުމާން (27އ) ގެ އަތުން ދެ ޕާސްޕޯޓުވެސް ވަނީ ފެނިފައެވެ.

އޭނާގެ ބަންދަށް އެންމެ ފުރަތަމަ ޖެހީ 5 ދުވަހެވެ. އެ މުއްދަތު ހަމަވުމުން ބަންދުގެ މުއްދަތު އިއްޔެ ވަނީ އިތުރުކޮށްފަ އެވެ.

ކޯޓު އަމުރުން އެނގޭ ގޮތުން ބަންދު އިތުރުކޮށްފައިވަނީ އޭނާގެ ޓްރެވަލް ހިސްޓަރީއަށް ބަލާއިރު ޝައްކުވާ ފަދަ އަމަލުތަކެއް ހުރި ކަމަށް ފެންނާތީ އެވެ.

ރަގޫބަށް ތުހުމަތުކުރެވޭ މަނީ ލޯންޑާކުރުމުގެ ތުހުމަތާ ގުޅޭ އެއްވެސް ހެއްކެއް ފުލުހުންނަށް ހުށަހެޅިފައި ނުވާ ކަމަށް ކޯޓު އަމުރުގައިވެ އެވެ. އޭނާގެ ވަކީލު ކޯޓުގައި ބުނީ އެ ފައިސާ ލިބުނު ގޮތް ފޯނުގައި ހުންނާނެ ކަމަށާއި އެކަމުގެ ތަފްސީލުތައް ބަޔާން ނަގާއިރު އެކަން ހާމަކޮށްދޭނެ ކަމަށެވެ.