އައު ޕްރޮސިކިއުޓާ ޖެނެރަލް (ޕީޖީ) އެއް ހޮވުމަށް ބޭނުންވާ އަދަދަށް ސޮއި ހަމަކޮށް ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބާއްވަން ތާވަލްކޮށްފި އެވެ.
ޕީޖީގެ މަގާމު ހުސްވެފައި ވަނީ އެ މަގާމުގައި ހުންނެވި ހުސައިން ޝަމީމް ވަކިކުރަން މަސައްކަތް ކުރުމުން އެ މަގާމުން އޭނާ އިސްތިއުފާ ދެއްވުމާ ގުޅިގެންނެވެ.
ގާނޫނުގައި އޮންނަނީ ޕީޖީގެ މަގާމު ހުސްވެއްޖެ ނަމަ، ލަސްވެގެން 30 ދުވަހުގެ ތެރޭގައި އާ ބޭފުޅަކު މަގާމަށް އައްޔަންކުރަން ޖެހޭނެ ކަމަށެވެ.
އެެހެންކަމުން އޭގެ ކުރިން މަޖިލީހުގެ ތިންބައިކުޅަ އެއްބައި މެމްބަރުންގެ ސޮއި ހަމަކޮށް މިރޭ ޕީޖީ އައްޔަނުކުރާ ޖަލްސާ ބައްވާ ޖަލްސާ ބޭއްވުމަށް މިހާރު ވަނީ ނިންމައިފަ އެވެ.
އާ ޕީޖީއަކު އައްޔަނުކުރާ ޖަލްސާ މިރެއަށް ތާވަލުކުރި ނަމަވެސް ޕީޖީގެ މަގާމަށް ބޭފުޅަކު އައްޔަންކުރަން ބޭފުޅެއްގެ ނަން މިހާތަނަށް ރައީސް ޑރ. މުހައްމަދު މުއިއްޒު ފޮނުއްވާފައެއް ނުވެ އެވެ.
ނަމަވެސް ތުންތުންމަތިން އަޑުއިވިފައިވާ ގޮތުން ރައީސް މުއިއްޒު މަސައްކަތް ކުރައްވަނީ މުހުތާޒް މުހުސިން އެ މަގާމަށް އަނބުރާ ގެނައުމަށެވެ.
