"އަޅުގަނޑު ޢަދުލުވެރިވާނަން. ބޭއިންސާފެއް ނުވާނަން. ވައްކަމާއި ކޮރަޕްޝަނަށް ހަރުއަޑުން ނޫނެކޭ ބުނާނަން. މި އުފެދޭ އާ ސަރުކާރުގައި އެކަންކަމަށް ފިޔަވަޅުއަޅާނެ! ސަރުކާރުގެ ދެފުށް ފެންނާނެ. ފޮރުވައި ސިއްރުކުރުމެއް، ވަންހަނާކުރުމެއް ނޯންނާނެ. މާތް ﷲގެ ހެޔޮ ތައުފީޤާއެކު، އިރާދަކުރެއްވިއްޔާ، ވީ ވަޢުދުތައް ފުއްދާނަން. ހީލަތްތެރިއެއް ނުވާނެ"

ދިވެހިރާއްޖޭގެ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ދިވެހި ޒަޢާމަތާ ހަވާލުވެވަޑައިގެން، ޤައުމާ މުޚާޠަބު ކުރައްވައި ދެއްވި ފުރަތަމަ ތަޤުރީރުގައި ވިދާޅުވީ އެމަނިކުފާނުގެ ވެރިކަމުގައި ސިއްރު ކުރުމެއް ނޯންނާނެކަމަށެވެ.

އެމަނިކުފާނު ވިދާޅުވި ހުރިހާ ވާހަކައެއް ގަބޫލު ކުރި އެތައް ބަޔަކު އެ ދުވަހު ތިއްބެވެ. ސަބަބެއް ވެސް ނެތިއެއް ނޫނެވެ. އެއީ 2023 ވަނަ އަހަރުގެ ރިޔާސީ އިންތިޚާބްގެ ކެމްޕެެއިން ދުވަސްވަރު ޕީޕީއެމް/ޕީއެންސީގެ ރިޔާސީ ކެންޑިޑޭޓް މ.ދިމްޔާތް މުހައްމަދު މުއިއްޒު ވަނީ އެތައް ފަހަރެއްގެ މަތިން އިބްރާހިމް މުހައްމަދު ޞާލިހްގެ ވެރިކަމުގައި ރައްޔިތުންނަށް ކަންކަން އޮޅުވާލާ، އެއްބަސްވުންތަކާ އެއްޗެހި ސިއްރުކޮށްގެން އުޅުމުން އެކަމަށް ފާޑުވިދާޅުވެފައެވެ.

ހަމައެކަނިން ރައީސް މުއިއްޒެއް ނޫނެވެ. އޭރު ޕީޕިއެމްގެ ސްޕޯކްސްޕާސަން ކަމުގެ މަގާމުގައި ހުންނަވާ ހީނާ ވަލީދު ވެސް ވަނީ ކުރީ ސަރުކާރުގައި އެތައް ގޮތް ނޭނގޭ އެއްބަސްވުންތަކެއް ހުރުމުގެ ސަބަބުން އެކަން ހާމަކުރުމަށް ގޮވާލާފައެވެ. އެގޮތުން އޭރު ހީނާގެ އެކްސް ހޭންޑްލްގައި ޕޯސްޓެއް ވެސް ކުރައްވާ އިބްރާހިމް މުހައްމަދު ޞާލިހްގެ ސަރުކާރުގައި ސިއްރުކޮށްފައި ހުރި ކަންކަން ވަނީ ހިއްސާވެސް ކޮށްފައެވެ.

އެގޮތުން ސިޔާސީ މަގާމްތަކުގެ އަދަދު ސިއްރުކުރުމާއި މުސާރައިގެ ތަފްސީލް ސިއްރުކުރުން، އިންޑިޔާ އާއެކު ހަދާފައިވާ އެތައް އެއްބަސްވުމެއް ސިއްރުކޮށްގެން އުޅުމުން އަޑުން އަޑު ނަގާ ހީނާ ވަނީ ރުޅިގަނޑު ބާލާފައެވެ. ބްރާވޯ އޭ ކިޔާ މާލާމަތް ވެސް ވަނީ ކޮށްފައެވެ. މިއީ ހީނާއަށް އޮޅުވާލާފައި ދޮގު ކުރެވޭނެ ކަންކަމެއް ނޫނެވެ. ކަންކަން ސިއްރުކޮށްގެން ހީނާ އެހާ ރުޅި އައިސް އެ ސަރުކާރުގެ ވެރިންނަށް ފޮޅާލި ބީދައިން މިއަދު މި ސަރުކާރުގެ އިސް ތަރުޖަމާނުގެ މަގާމުގައި ހުންނަވާ ކަންކަން ސިއްރުކުރަމުންދާތީ ރުޅިއައިސް ފޮޅާ ނުލެވިގެން މިއުޅެނީ ކީއްވެތޯ؟

ރައީސުލްޖުމްހޫރިއްޔާގެ އޮފީހުގައި އިސް ތަރުޖަމާނުގެ މަގާމުގައި ހުންނަވާ ކަންކަން ހާމަކުރުމަށް ކިތައް ފަހަރު މަތިން ހީނާއަށް ނޫސްވެރިންގެ ބައްދަލުވުންތަކެއް ބޭއްވުނުތޯ؟ ބޭއްވުނު ދެތިން ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ހީނާއަށް ޖަވާބުދެވުނުތޯ؟ ނުވަތަ ޖަވާބު ދިނުމަށް އެއްވެސް މަސައްކަތެއް ކުރެވުނުތޯ؟ކަންކަމުގެ މައުލުމާތު ހޯދުމަށް ނޫސްވެރިން ހީނާ އަށް ގުޅާއިރު، ކިތައް ފަހަރު ފޯނު ނެންގެވިންތޯ؟ ހާމަކަންބޮޑު ކަމަށް ދައުވާ ކުރާ ސަރުކާރުގެ ކަންކަން ފޮރުވިފައި ހުރެގެން އެކަންކަން ހޯދުމަށް ހީނާ އަށް މެސެޖް ކުރުމުން ރިޕްލައި ކުރީ ކިތައް ފަހަރުތޯ؟

ނޫސްވެރިންގެ ބައްދަލުވުންތަކުގައި ވެސް ސަރުކާރުން ކަންކަން ސިއްރުކުރާތީ އެވާހަކަ ބުނީމާ، ހީނާ ވިދާޅުވީ ސަރުކާރަށް 9 މަސްވެގެން ދިޔައިރު އެކިފަހަރު އެކި ގޮތްގޮތުގެ މަތިން މައުލޫމާތުތައް ހިއްސާކޮށްފައިވާނެކަމަށެވެ. އަޖައިބުވެ އަންތަރީސްވީމެވެ.

މި ސަރުކާރުގައި ރައިޓް ޓު އިންފޮމޭޝަން (އާރްޓީއައި) ލާން ނުޖެހޭނެކަމަށް ވެރިޔާ މިދިޔަ އަހަރުގެ ޑިސެމްބަރު 25 ވަނަ ދުވަހު ވިދާޅުވިއިރު ކަންވެގެން ދިޔައީ އެގޮތަކަށެއް ނޫނެވެ. އާރްޓީއައި ވެސް ލާންޖެހެއެވެ. އާރްޓީއައި ލައިގެން މަސް ދެމަސް ކީއްކުރަން 6 މަސްވެގެން ދާއިރުވެސް އެޔަކަށް ޖަވާބެއް ނުލިބެއެވެ، އެހެންނަމަވެސް ތަރުޖަމާނު މި ވިދާޅުވަނީ އާރްޓީއައިތަކަށް ވެސް ޖަވާބު ދެމުންގެންދާކަމަށެވެ. ބުހުތާނު ބޮޑެތި ދޮގުތައް ހަދަމުންދާއިރު ހަމަ ދުވަހެއް އަދި އެބައޮތްކަމެއް ހީނާއަށް ނޭނގެނީތޯއެވެ؟

ހީނާއެވެ. ކުރީ ސަރުކާރުން ކަންކަން ސިއްރުކޮށްގެން ފޯރި އެރުވިއިރު، މިއަދު ހީނާ އިސް ތަރުޖަމާނުގެ މަގާމުގައި ހުންނަވާ މި ސަރުކާރުގެ އެއްްވެސް ކަމެއް ހާމަނުކުރައްވަނީ ކޮން ސަބަބަކާހުރެތޯއެވެ.