ރައީސް ޑރ. މުހައްމަދު މުއިއްޒުގެ ސަރުކާރުން ކުރާ ކޮންމެ ކަމެއް ކުރަނީ ނާޖާއިޒް ކޮށް މީހުންނަށް ރިޝްވަތު ދީގެން ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ދަ ފްރޮންޓް އޮފީހުގައި ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޕީޕީއެމް ދޫކުރައްވާ އެމަނިކުފާނު ވަޑައިގެންނެވި ސަބަބުތައް ހާމަކޮށްދެއްވަމުން ރައީސް ޔާމީން ވިދާޅުވީ، އެހެން އެކަން ކުރެއްވީ ނުހަނު ބަރު ހިތަކާ އެކު ކަމަށާ ނަމަވެސް މަޖްބޫރުވެވަޑައިގެން ކަމަށެވެ.

އެގޮތުން ޕީޕީއެމް ސެނެޓަކީ ޑރ. މުއިއްޒު ބައްލަވައިގަތްފައިވާ އެއްޗެއް ކަމަށާއި، އެހެން އެކަންވީ ސެނެޓްގެ ގިނަ ބޭފުޅުންނަކީ ސިޓީ ކައުންސިލުން މުއިއްޒު ވަޒީފާ ދެއްވާފައި ތިބި ބޭފުޅުންނަށް ވީތީ ކަމުގައި ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ރައީސް މުއިއްޒު ކަންކަން ކުރައްވަނީ ރައްޔިތުންގެ ތާއީދު ހޯއްދަވައިގެންނެއް ނޫން ކަމުގައެވެ.

ރައީސް ޔާމީން ވިދާޅުވީ މުއިއްޒު ކުރައްވާ ކަންކަން ކުރައްވަނީ ފައިސާގެ ބާރުގައި ކަމަށެވެ.

އެކަން އެހެން އޮތުމާއެކު ޕީޕީއެމްގެ ތެރޭގައި ހުންނަވައިގެން އެއްވެސް ކަމެއް ކުރައްވާކަށް ގާނޫނީ ޖާގައެއް ލިބިވަޑައިނުގެންނެވި ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ފާހަގަ ކުރެއްވި ގޮތުގައި ޕީޕީއެމްގެ ނައިބު ރައީސުންގެ ގޮތުގައި ތިއްބެވި ޣައްސާން މައުމޫން އާއި އަހްމަދު ޝިޔާމް ތިއްބެވީ ޕީޕީއެމްގެ ހުރިހާ އުސޫލްތަކަށް ޣައްދާރުވެފައި ކަމަށެވެ.