ޖަމާޢަތް ބޮޑު ނަމާދު ތަކުގައި ޤުރުއާން ކިޔަވާއިރު ކުރުކޮށް ކިޔެވުމަށް އިސްލާމިކް މިނިސްޓަރ ޑރ ޝަހީމް އަލީ ސައީދު އިލްތިމާސްކުރައްވައިފި އެވެ.
މިނިސްޓަރގެ އެކްސް އެކައުންޓް އިން ކުރެއްވި ޕޯސްޓެއްގައި ވިދާޅުވީ ހުކުރު ނަމާދު ފަދަ ޖަމާޢަތް ބޮޑު ނަމާދުތަކުގައި ބައެއް ޚަޠީބުން ވަރަށް ދިގުކޮށް ކިޔަވާކަމަށް ޝަކުވާ އަންނަމުންދާ ކަމަށެވެ.
އެގޮތުން މި ފަދަ ޖަމާޢަތް ބޮޑު ނަމާދު ތަކުގައި ސުންނަތްވެގެންވާ ގޮތަކީ ކުރުކޮށް ކިޔެވުން ކަމަށާއި ޖަމާޢަތުގައި ބަލިމީހުންނާއި އުޒުރުވެރިން އަދި ކުޑަކުދިންވާނެކަން އިމާމުގެ ހަނދާނުގައި ބެހެއްޓުން މުހިންމު ކަމަށް މިނިސްޓަރ ވިދާޅުވިއެވެ.
އެގޮތުން ވިއްސާރަވާ އިރު ވިއްސާރައިގަ އަދި ގަދަ އަވިދޭ އިރު އަވީގައި ވެސް ޖަމާޢަތުގެ ބޮޑު ބައެއް އޮންނަކަން ފާހަގަކުރައްވައި މިނިސްޓަރ ވިދާޅުވީ މިފަދަ ކަންކަމާމެދު ސަމާލުވުމަކީ ފިޤުހުވެރިކަމުގެ ތެރެއިންވާކަމެއް ކަމަށެވެ.
