ނުކުޅެދުންތެރިކަން ހުންނަ ފިރިހެނަކަށް ޖިންސީގޯނާކުރި ދިވެހި ފިރިހެނަކު ހައްޔަރު ކޮށްފިއެވެ.
މިކަމާ ގުޅިގެން ފުލުހުން ހާމަކޮށްފައިވާ ގޮތުގައި، ދެކުނުގެ ސަރަހައްދުގެ ރަށެއްގައި ނުކުޅެދުންތެރިކަން ހުންނަ ފިރިހެނަކަށް ޖިންސީގޯނާ ކުރި މައްސަލައެއް އެ ހިދުމަތުގެ ސަމާލުކަމަށް އޭޕުރީލު 14 ވަނަ ދުވަހު ގެނެސްފައިވެއެވެ.
އެ މައްސަލައާ ގުޅިގެން މިދިޔަ ބުދަ ދުވަހު ކޯޓު އަމުރެއްގެ ދަށުން ހައްޔަރުކުރީ އުމުރުން 57 އަހަރުގެ ދިވެހި ފިރިހެނަކު ކަމަށް ފުލުހުން ހާމަކޮށްފައިވެއެވެ.ތޭރަ އޮންލައިނަށް މައުލޫމާތު ލިބިފައިވާ ގޮތުގައި، މިއީ ފުވައްމުލަކު ސިޓީގައި ހިނގި ހާދިސާ އެކެވެ.
ފުލުހުން މައުލޫމާތު ދިން ގޮތުގައި ހައްޔަރުކުރި މީހާގެ ބަންދާމެދު ގޮތެއް ނިންމުމަށް ބުރާސްފަތި ދުވަހު ކޯޓަށް ހާޒިރުކުރުމުން ޝަރީއަތް ނިމެންދެން އޭނާ ބަންދުގައި ބެހެއްޓުމަށް ކޯޓުން އަމުރުކޮށްފައިވެ އެވެ.
މީގެ އިތުރުން މި މައްސަލާގައި ޖިންސީ އަނިޔާގެ ޝިކާރައަށްވީ މީހަކީ ނުކުޅެދުންތެރިކަން ހުންނަ މީހަކަށްވާތީ އެ މައްސަލައާމެދު ފުލުހުން އަމަލުކުރަމުންދަނީ ކުޑަކުދިންނަށް ޖިންސީ ގޯނާކުރުމުގެ މައްސަލަތަކާމެދު އަމަލުކުރާ އުސޫލުން ކަމަށް ފުލުހުން ބުނެފައިވެއެވެ.
