ރައީސް ޑރ. މުހައްމަދު މުއިއްޒު ދަނީ ބޭޒާރުވެ ފަލީހަތްވަމުން ކަމަށް ޕީއެންއެފްެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ ރައީސް އަބްދުﷲ ޔާމީންގެ މައްޗަށް ނުހައްގު ދައުވާތަކެއް އުފުލާ އަނެއްކާވެސް އާރަށުގެ މައްސަލައިގެ އަޑު އެހުންތައް ފެށުމުން، އެކްސްގައި ކުރެއްވި ޕޯސްޓެއްގައެވެ.

މަލީހު ވިދާޅުވީ، ރައީސް އޮފީހުން އަތް ބާނައިގެން އަނެއްކާވެސް ސިޔާސީ ދައުވާ އުފުލުން ރީސްޓަރޓް ވެއްޖެކަމަށެވެ. އަދި އެއީ ހަރާން ހުކުމެއް ކަމަށް މީގެ ކުރިން ރައީސް މުއިއްޒު ވިދާޅުވެފައި މިހާރު ރާގު ބަދަލުވެގެން އުޅޭތީ ވެސް މަލީހު ވަނީ ފާޑުވިދާޅުވެފައެވެ.

އެގޮތުން މަލީހު ވިދާޅުވީ އަދުރޭ ޖޭއެސްސީގައި ބައިންދައިގެން ރައީސް މުއިއްޒު ވެސް ގެންދަވަނީ އެމްޑީޕީ ސަރުކާރުގައި ރައީސް ޔާމީނަށް ކުރި އަނިޔާގެ ސިލްސިލާ ތަކުރާރުކުރަމުން ކަމަށެވެ. މަލީހު އިތުރަށް ވިދާޅުވީ މިފަދަ ކަންކަމުން ރައީސް މުއިއްޒު ބޭޒާރުވެ ރައްޔިތުން ކުރިމަތީ ފަލީހަތްވެ އިތުބާރު ގެއްލެމުންދާ ކަމަށެވެ.

މަލީހު މިފަދައިން ވިދާޅުވެފައިވާއިރު ރައީސް ޔާމީންގެ މައްޗަށް އާރަށުގެ މައްސަލައިގައި އަލުން ދައުވާތއް ކޯށް މައްސަލައިގެ އަޑު އަޑުއެހުންތައް ވަނީ ފަށާފައެވެ. ނަމަވެސް ރިޔާސީ އިންތިހާބުގެ ތެރޭގައި ރައީސް މުއިއްޒު ވަނީ، ރައީސް ޔާމީންގެ މައްޗަށް އޭރު އިބްރާޙިމު މުހައްމަދުގެ ސަރުކާރުން އުފުލާ ހުކުމް ކުރީ ސިޔާސީ ގޮތުންކަމަށް ވިދާޅުވެފައެވެ. އަދި ރައީސް އޮފީހުން ޖުޑިޝީއަރީއަށް ނުފޫޒު ފޯރުވުން ހުއްޓާ ހިސާބުން ރައީސް ޔާމީންގެ މައްސަލަތައް ނިމޭނެ ކަމަށް ރައީސް މުއިއްޒު ވިދާޅުވެފައިވެއެވެ. އެހެންކަމުން މިހާރު ރައީސް މުއިއްޒުގެ ސަރުކާރުން ޖުޑިޝިއަރީއަށް ނުފޫޒު ފޯރުވަނީ ކަމަށް ގިނަ ބަޔަކު ތުހުމަތުކުރެއެވެ.