ރާއްޖޭގެ ސިޔާސީ މަޝްރަހުގައި މިހާރު ފެންނަމުންދާ މިދާ މަންޒަރާއި ހިނގަމުން އަންނަ ކަންތަކަށް ބަލާއިރު ނަޒަރު ގޮސް ހުއްޓެނީ އެމްޑީޕީ އައި ޑިމޮކްރެޓްސް އިން ކުރިން ބޭނުން ކުރި ޖަގަހައަށެވެ. އާދެ، އެ ޖަގަހަ އަކީ މިއަދު ސަރުކާރު ހިންގާ މައި ޕާޓީ، ޕީޕާލަލްސް ނެޝަނަލް ކޮންގްރެސް (ޕީއެންސީ) ގެ ހަރުގެއެވެ. ގައުމުގައި ކަމެއް ހިނގާއިރަށް ރައީސް މުހައްމަދު މުއިއްޒު އިސްވެ ހުންނަވާ، މަޖިލިސް ރައީސްއާއި، ސަރުކާރުގެ ވުޒާރާތަކުގެ އިސްވެރިންނާއި، ރައްޔިތުންގެ މަޖިލީހުގެ ޕީއެންސީ މެމްބަރުންނާ، ކުންފުނިތަކުގެ ދެތިން ކުދިންކޮޅު އެއްވެގެން ތުހުމަތު އިނގިލި ދިއްކޮށްލެވޭ މައްސަލަތަކުން ބަރީއަވެ ވަޑައިގަތުމަށް ބާއްވާ ފޯރަމްތަކެކެވެ.

ނޫ ޖަގަހައިގައި ބާއްވާ އެ ޖަލްސާތަކުގައި ފެނިގެންދަނީ ސަރުކާރު ޖަވާބުދާރީ ކުރުވުމަށް ބައެއް ފަރާތްތަކުން ކުރާ މަސައްކަތްތަކަށް ފާޑުކިޔާ އިހުތިރާމްކުޑަވާ ޒާތައް ވާހަކަތައް ދައްކަވަމުން ގެންދަވާ މަންޒަރެވެ. ނޫ ޖަގަހައިގެ އެ ޕޯޑިއަމް އަކީ އެތަނަށް އަރައިގެން ދޮގުން ދޮގު ހަދާފައި ވާހަކަ ދައްކަން މަޖުބޫރު ޕޯޑިއަމް އެކެވެ. އެތަނަށް އަރާ ދައްކަވާ ކޮންމެ "ހަގީގަތެއް ނެތް" ވާހަކައަކަށް އޯޑިއަންސް އިން އަތްތިލަ ބަޑި ޖަހަން ވެސް ހަމަ އެހާމެ މަޖުބޫރުކުރެއެވެ. އާދެ ސުވާލު މި އުފެދެނީ މިހާ ހިސާބުންނެވެ. މަޖުބޫރު ކުރަނީ ކާކުތޯއެވެ. މަޖުބޫރު ކުރަނީ މަޖިލިސް ރައީސް އަބްދުއްރަހީމް އަބްދުﷲ (އަދުރޭ) އެވެ. އަދުރޭ ޖަލްސާގައި ކަންކަން ވާންޖެހޭނެ ގޮތް ކުރީބައިގައި ކިޔާ އެގޮތައް ކަންތައް ނުކުރާ މީހުންނަށް އޭނާގެ ހާސަރު ދައްކާލައެވެ.

ރައީސް މުއިއްޒެވެ. މަނިކުފާނު މިއަދު ހަނދުމަފުޅު ނެތުނަސް އިއްޔެވީ ކަމެއް ފަދައިން ރިޔާސީ އިންތިޚާބްގެ ކެމްޕެއިން ދުވަސްވަރު ދެއްކެވި ވާހަކަތައް ކެމެރާތަކުގެ ލެންސްތަކަށް ވަނީ ރެކޯޑް ކުރެވިފައެވެ. ގަލަންތަކުގެ ދެލިހުސްވާ މިންވަރަށް ވަނީ ލިޔެވިފައެވެ. ނޫސްތަކުގެ ފަލަ ސުރުޚީތަކުގައި އެ ވާހަކަ ކިތަންމެހާވެސް ގިނައިން ލިޔެވުނުއެވެ. ރައީސް ޔާމީންގެ ހުސް ގޮނޑިއާއި، އެމަނިކުފާނުގެ ފޮޓޯ ފުޅާ އެމަނިކުފާނުގެ ނަންފުޅު ބޭނުންކުރައްވައިގެން ވެރިކަން ހޯދިކަން މިއީ މަނިކުފާނަށް ދޮގު ކުރެވޭނެ ކަންކަމެއް ނޫނެވެ. މިއަދު ނޫ ޖަގަހައިގައި ރައީސް ޔާމީނަށް އިހުތިރާމް ކުޑަވާ ގޮތައް ވާހަކަ ދައްކަވާ އެމަނިކުފާނު ޖަލަށްލާނެ ކަމުގެ އިންޒާރު ދެމުންގެންދާއިރު ކުޑަ ވެސް މިންވަރަކަށް ލަދުހަމަ ނުގަންނަނީތޯއެވެ.

ރައީސް މުއިއްޒެވެ. މަނިކުފާނަކީ ހެޔޮ ވެރިކަމެއް ކުރެއްވުމަށްޓަކައި ރައްޔިތުންގެ ކުރިމަތީ އެތައް ބޮޑެތި ވައުދުތަކާއި އަހުދުތަކެއް ވެވަޑައިގެން ހުންނެވި ބޭފުޅެކެވެ. ތިޔަ ގެންދަވަނީ އެ ވައުދުތައް ފުއްދަވަމުންކަމަށާއި ރައީސް ޔާމީން މިނިވަންކުރެއްވީ މަނިކުފާނު ކަމަށް ދައްކަވަން ތިޔަ ކުރައްވަމުން ގެންދަވާ މަސައްކަތުން މިއަދު މަނިކުފާނު ތިޔަ ދަނީ ރައްޔިތުންގެ ކުރިމަތީގައި އިތުރަށް ފަލީހަތްވެ ބޭޒާރުވަމުންނެވެ. މިއަދު މަނިކުފާނު ތިޔަ އުޅުއްވާ ގޮތް ސިފަވަނީ ސާރކަސް އެއްގެ "ޖޯކަރެއް" ގޮތަށެވެ.

ކަމެއްވާއިރަށް ސަރުކާރުގެ ސިޔާސީ މުވައްޒަފުން ނެރެ ޓްވީޓްކުރަން ޖައްސާއިރު، ދަންނަވަންތޯއެވެ. މަނިކުފާނު ތިޔަ އުޅުއްވާ ގޮތުން މަނިކުފާނަށް ރައްޔިތުން ކުރަމުން އައި ޤަދަރު އެ ދަނީ ނެތެމުންނެވެ. ހެޔޮކަމެއް ކޮށްދޭ މީހާއަށް ބަދަލު ދޭންވާނީ ތެޔޮހަމެއްގެ ސިފައެއްގައެއް ނޫނެވެ.ރައީސް ޔާމީންގެ އެހީއާއެކު ހޯދި ވެރިކަމެއްގައި ހުރެ އެމަނިކުފާނަށް ބަދު ބަސްބުނެ، އެމަނިކުފާނަށް އަނިޔާ ދިނުން ރައްޔިތުން ބަލައެއް ނުގަންނާނެއެވެ. މިއަދު ދިވެހި ރައްޔިތުން މަނިކުފާނަށް ދޭން ބޭނުންވާ ނަސޭހަތެއް އެބައޮތެއެވެ. ކަމެއްވާއިރަށް ޑިފެންސަށް ނުކުޅި، ކޮރަޕްޝަންގެ އަމަލުތައް ނުހިންގަވާ، ވެވަޑައިގެންނެވި ވައުދުތައް ފުއްދަވާ ހެޔޮ ބަސް އަހާ،ޤަބޫލުކުރާ މީހަކަށް ވާށެވެ.