ޝަރުއީ ދާއިރާއަށް ރައީސް އޮފީހަކުން ނުފޫޒު ނުފޯރުވާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވި ނަމަވެސް އެއްފަހަރުވެސް ދައުލަތުގެ އެހެން މުއައްސަސާއަކުން ނުފޫޒު ނުފޯރުވާނެކަމަށް ވިދާޅުވެފައި ނުވާކަމަށް ވަކީލު އާދަމް އާސިފް ވިދާޅުވެއްޖެ އެވެ.

އާސިފް މިފަދައިން ވިދާޅުވެފައި ވަނީ ޗެނަލް 13 ގެ "ސިޔާސީ ދައުވާ" މި ޕްރޮގްރާމްގައި ވާހަކަދައްކަވަމުންނެވެ.

އެގޮތުން އަދުގެ ސަަރުކާރުން ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތްތަކަށް ނުފޫޒު ފޯރުވާފާނެކަމަށް ގަބޫލުކުރައްވަންތޯ ކުރި ސުވާލަށް ޖަވާބު ދެއްވަމުން އާސިފް ވިދާޅުވީ ނުފޫޒު ފޯރުވާނެކަމީ އޭގައި އެއްވެސް ޝައްކެއް އޮތްކަމެއް ނޫންކަމަށެވެ.

އާސިފް ވިދާޅުވީ ރައީސް މުއިއްޒު ވެރިކަމަށް އައުމުގެ ކުރިން ރިޔާސީ އިންތިޚާބްގެ ކެމްޕެއިން ދުވަސްވަރުގައި ވެސް ޝަރުއީ ދާއިރާއަށް ރައީސް އޮފީހުން ނުފޫޒު ފޯރުވުން ހުއްޓާލާނެ ކަމަށް ވިދާޅުވި ކަމަށާއި އޭގެއިތުރުން ވެރިކަމުގެ ހުވާ ކުރައްވާ ދިވެހިރާއްޖޭގެ ރައްޔިތުންނާ މުޙާތަބުކުރައްވާ ދެއްވެވި އެންމެ ފުރަތަމަ ތަގުރީރުގައި ވެސް ރައީސް އޮފީހުން ޝަރުއީ ދާއިރާއަށް ނުފޫޒު ނުފޯރުވާނެކަމަށް ވިދާޅުވި ކަމަށެވެ.

އެހެން ނަމަވެސް އެއްމެ ފަހަރަކުވެސް ދައުލަތުގެ އެހެން މުއައްސަސާއަކުން ޝަރުއީ ދާއިރާއަށް ނުފޫޒު ނުފޯރުވާނަމެކޭ ވިދާޅުވެފައި ނެތްކަމަށް ވިދާޅުވެ ވަކީލް އާސިފް ވަނީ ރައީސް މުއިއްޒުގެ ފާޑުވިދާޅުވެފައެވެ.