މުލިއާގެއިން ރައްޔިތުންގެ މަޖިލީހުގެ ޕީއެންސީ މެމްބަރުންނަށް ބައި ލައްކަ ރުފިޔާ ދޭކަން ހާމަކުރާ މެމްބަރުން ހޯދުމުގެ މަސައްކަތް ހޯމް މިނިސްޓަރު އަލީ އިހުސާނު ކުރައްވަމުން ގެންދަވާ ކަމަށް ކެނދިކުޅުދު ދާއިރާގެ ކުރީގެ މެމްބަރު އަހުމަދު އީސާ ވިދާޅުވެއްޖެއެވެ.

އީސާ މިފަދައިން ވިދާޅުވެފައިވަނީ ރޭ ބޭއްވި އެމްޑީޕީ "ހަވަރު ބެރު" ޕްރޮގްރާމުގައި ވާހަކަ ދައްކަވަމުންނެވެ.

ރައީސް މުހައްމަދު މުއިއްޒުގެ ފަރާތްޕުޅުން ރިޝްވަތުގެ ގޮތުގައި ބައްސަވާކަމަށްވާ ފައިސާ ނުނަންގަވާ ޕީއެންސީގެ މަޖިލިސް މެންބަރުން ތިއްބަވާކަން ފާހަގަކުރައްވައި އީސާ ވިދާޅުވީ، އެވާހަކަތައް ހިއްސާ ކުރެއްވީ އެ މެންބަރުން ކަމުގައެވެ. ނަމަވެސް އެއީ ކޮން މެންބަރުންނެއް ކަމެއް އީސާ ސީދާ ވިދާޅެއް ނުވެއެވެ.

އީސާ ވިދާޅުވީ އެމްޑީޕީއަށް އެ މައުލޫމާތު އެ މެމްބަރުން ހިއްސާކުރަމުން ގެންދާތީ މިހާރު އެ މެމްބަރުން ހޯދުމަށް ސަރުކާރުން ފާރަލަމުން ގެންދަން ފަށައިފި ކަމަށެވެ.

ރައީސްގެ ފަރާތުން ޕީއެންސީގެ މެންބަރުންނަށް ކޮންމެ މަހަކު ފައިސާ ދޭ ވާހަކަ "ސުވާލެއް ނެތް މިންވަރަށް" ސާފު ކަމަށް ވެސް އީސާ ވިދާޅުވެފައިވެއެވެ.

ރައީސް މުއިއްޒު އަަދި ސަރުކާރަށް އަމާޒުވެފައިވާ މި މައްސަލައާއު ގުޅޭގޮތުން އަދަދު ނޫހުން ވަނީ ހާއްސަ ވީޑިއޯ ރިޕޯޓެއް ގެނެސްދީފައެވެ. އެ ރިޕޯޓުގައި ޖުމްލަކޮށް އެނޫހުން ގެނެސްދީފައިވަނީ ޕީއެންސީގެ މެންބަރުންނަށް ކޮންމެ މަހަކު50،000 (ފަންސާސް ހާސް ރުފިޔާ) ރައީސް މުއިއްޒު ދެއްވާ ކަމެވެ.

އެންމެ ފަހުން ނިމިދިޔަ މަހުގެ ފައިސާގެ ގޮތުގައި އާންމުކޮށް ދެމުން އަންނަ 50،000ރ. އަށް 25،000ރ އިތުރު ކުރުމަށްފަހު ދީފައި ވަނީ 75،000ރ. ކަމަށް ވެސް ބައެއް މެންބަރުންނަ ހަވާލާދީ "އަދަދު" ނޫހުގައި ރިޕޯޓުކޮށްފައިވެއެވެ.

މައިގަނޑުގޮތެެއްގައި ރިޕޯޓުގައި ހާމަކޮށްފައިވަނީ ކަޅު ދަބަހެއްގެ ވާހަކައާއި ޕީއެންސީ ބައެއް މެންބަރުން އެމައުލޫމާތު ދެއްވާ ކަމެވެ.

ނަމަވެސް ސަރުކާރުގެ ފަރާތުން އިސް ތަރުޖަމާނު ހީނާ ވަލީދު ވަނީ މިކަން ދޮގު ކޮށްފައެވެ. އަދި "އަދަދު" ނޫހާ މެދު ފިޔަވަޅު އެޅުމަށް ވަނީ ނިންމާފައެވެ.