މަޖިލީހުގެ ރައީސްގެ މަގާމުގައި ހުރި އަބްދުއްރަހީމު އަބްދުﷲ (އަދުރޭ) އަކީ ލައިބިލިޓީއެއްކަން ނުވަތަ ގައުމަށް ހުރި ގެއްލުމެއް ކަން ދަނި ސާބިތުވަމުން ކަމަށް ޕިއެންއެފްގެ ސެކެރެޓަރީ ޖެނެރަލު މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މަލީހުގެ ޕޯސްޓުގައި ވަނީ މިދިޔަ އަހަރުތަކުގެ ތެރޭގައި އަދުރޭ އޭނާގެ މާލީ ހާލަތާ ނުބައްދަލު އަގެއްގައި ފެލްޓުތަކެއް ގަތްކަން ހާމަވާ ސިޓީތަކެއް ކޮޕީ ހިއްސާކޮށްފައެވެ.
މަލީހު އިތުރަށް ވިދާޅުވެފައިވަނީ އަދުރޭ އިސްތިއުފާ ދޭން ޖެހޭ ކަމަށާ އަދި އޭސީސީ ފަދަ މުއައްސަސާތައް ކޮބައިތޯވެސް މަލީހު ސުވާލުކުރައްވާފައިވެއެވެ.
މަލީހު ވިދާޅުވެފައިވަނީ އެ ފްލްޓުތައް އަދުރޭ ގަތްކަން ޙާމަވާން ހުރި ތާރީޚުތަކުގެ ދުވަސްވަރު އަދުރޭ ބުނެފައިވަނީ އޭރު އޭނާގެ އަތުގައި ގޭގެ ކަރަންޓު ބިލުވެސް ދެއްކޭނެ މިންވަރުވެސް ނެތް ވާހަކަ ކަމަށާ އަދި ކުރި އަޅު މަސައްކަތްކަމަށް ބުނެފައިވާ ކަމަށެވެ. އެހެންކަމުން މިއީ މަޖިލީހުގެ ކޮމިޓީއަކުން ބަލަން ޖެހޭ މައްސަލައެއް ކަމަށް މަލީހު ވަނީ ވިދާޅުވެފައެވެ.
