ރާއްޖޭގެ ބޭންކިން ނިޒާމުގެ ތެރޭގައި އެއް އާއިލާއަކަށް ނިސްބަތްވާ ބޭފުޅުންތަކެއްގެ ބާރު އޮތުމުން، ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ފާޑުވިދާޅުވެއްޖެއެވެ.

މަލީހުގެ ފާޑުކިޔުން އަމާޒުކުރެއްވީ އެކަމާ ގުޅިގެން އެކްސްގައި ކުރެއްވި ޕޯސްޓެއްގައެވެ.

ބީއެމްއެލްގެ ބޯޑަށް ރައީސް އޮފީހުގެ ކެބިނެޓު ސެކެރެޓަރީ އަހުމަދު ހަބީބު އަލީ އައްޔަންކުރައްވަން އުޅޭކަމަށް ރާއްޖޭގެ ބައެއް ނޫސްތަކުގައި ރިޕޯޓުކޮށްފައިވެއެވެ. މިކަމާ ގުޅިގެން ހަސަން ކުރުސީގެ ނަމުގައި ހިންގާ އެކްސް ހެންޑްލްގައި ވަނީ ރާއްޖޭގެ ބޭންކިން ނިޒާމުގައި އެއް އާއިލާގެ ނުފޫޒު އޮތްކަމަށް ބުނެފައެވެ.

އެގޮތުން ބީއެމްއެލްގެ ޗެއަރ ޕާސަންއަކަށް އަހުމަދު ހަބީބު އައްޔަންކުރައްވާއިރު، އަހުމަދުގެ އެއްބަޑު އެއްބަފާ ބޭފުޅެއް ކަމަށްވާ ހުސެއިން އަލީ ހަބީބު ހުންނަވަނީ އެމްއައިބީގެ ކޮމްޕެނީ ސެކެރެޓަރީގެ މަގާމުގައެވެ. އަދި މީގެ އިތުރުން އަހުމަދު އަކީ ފޮރިން މިނިސްޓަރު މޫސާ ޒަމީރުއަާ އާއިލީ ގުޅުން އޮންނަ ބޭފުޅެއްކަމަށް މައުލޫމާތު ލިބިފައިވައިރު އިސްލާމިކު ބޭންކުގެ ބޯޑު އޮފް ޑިރެކްޓަރަކަށް ހުންނަވާ މައުސޫމާ ޔުސުފް އަކީ ވެސް ޒަމިރުގެ ފަހަރިއެއް ކަމަށް މައުލޫމާތު ލިބިފައިވެއެވެ. އެހެންކަމުން އާއިލީ ގޮތުން ގުޅުން އޮތް ބޭފުޅުންތަކެއްގެ ބާރު ރާއްޖޭގެ ބޭންކިންގެ ނިޒާމުގެ ތެރޭގައި އޮތުމަކީ ކަންބޮޑުވުމެއް ކަމަށް މަލީހު ވިދާޅުވެފައިވެއެވެ.

މީގެ އިތުރުން ބީއެމްއެލްއިން ކާޑުން ނެގޭ ޑޮލަރު ލިިމިޓުކޮށް ނިންމި ނިންމުމަކީ މާލީ ބަޣާވާތެއް ކަމަށް ނިންމަވާ ބީއެމްއެލްގެ ބޯޑަށް ވެސް ރައީސް މުހައްމަދު މުއިއްޒު ނުފޫޒު ފޯރުވުމަށް ފަހު އެމަނިކުފާނުގެ ކެބިނެޓު ސެކެރެޓަރީ ބީއެމްއެލްގެ ޗެއަރޕާސަންއަކަށް އައްޔަންކުރުމަކީ މަސްލަހަތު ފުށުއަރާނެ ކަމެއްކަމަށް މަލީހު ވިދާޅުވެފައިވެއެވެ.

އެގޮތުން ކެބިނެޓަކީ ސިއްރު ވާހަތަކެއް ހިއްސާކުރާނެ ބައްދަލުވުންތަކެއް ބާއްވާނެ ބަޔަކަށް ވާއިރު އެ ބައްދަލުވުންތަކުގައި ދައްކާ ވާހަކަތައް އަހުމަދުއަށް އެނގުމަކީ އެހެން ބޭންކުތަކަށް ވެވޭނެ ބޭ އިންސާފެއް ކަމަށް ވެސް މަލީހު ވިދާޅުވެފައިވެއެވެ.

މީގެ އިތުރުން ސަރުކާރުގެ މަގާމެއްގައި ހުރި ބޭފުޅަކު ސަރުކާރު ބޭންކުގެ ޗެއަރ އަކަށް އައްޔަންކުރުމަކީ މިއީ ރާއްޖޭގެ ޤާނޫނުތައް ތަންދޭ ކަމެއް ނޫންކަމަށާ އަދި ގޫޑް ގަވަރނަންސްއާއި ކޯޕަރޭޓް ގަވަރނަންސާއި ވެސް ޚިލާފު ޚުދުމުހުތާރު ނިންމުމެއްކަމަށް މަލީހު ވިދާޅުވެފައިވެއެވެ.

ހަމަ އެހެންމެ މިފަދަ ކަންކަމުގެ ސަބަބުން ބޭންކަށް އޮންނަ ރައްޔިތުންގެ އިތުބާރު ގެއްލޭފަދަ ނިންމުމެއް ކަމަށާ ނިންމުން ބަދަލުކުރުމަށް ސަރުކާރަށް މަލީހު ގޮވާލައްވާފައިވެއެވެ.