މަނީ ލޯންޑަރ ކުރިކަމަށް ބުނެ އެމަނިކުފާނަށް ހުކުމްކުރުމަށް ފަހު ގޮސް ފަނޑިޔާރު އަހުމަދު ޝަކީލު ކުރެއްވީ މަނީ ލޯންޑަރ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ، ހޯމަ ދުވަހުގެރޭ ދަ ފްރޮންޓު އޮފީހުގައި އޮތް ޖަލްސާގައި ވާހަކަފުޅު ދައްކަވަމުންނެވެ.

އެ ޖަލްސާގައި ވާހަކަ ދައްކަވަމުން ވަކީލު އާދަމް އާސިފް ވަނީ ރައީސް ޔާމީން އޭރު ވެސް ކުރެއްވީ ޖިހާދެއް ކަމަށާ އަބަދުވެސް އެމަނިކުފާނު ހުންނެވީ ސާބިތުކަމާ އެކުކަން ވެސް ފާހަގަކުރައްވާފައެވެ.

އެ ވާހަކަތަކަށް އިޝާރާތްކުރައްވާ ރައީސް ޔާމީން ވިދާޅުވީ، އެމަނިކުފާނު ކުރެއްވީ ޖިހާދެއް ނޫން ކަމަށާ އެމަނިކުފާނު ތަހައްމަލު ކުރެއްވީ އަނިޔާވެރިކަމާ ނާއިންސާފުވެރިކަން ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ އެފަދައިން ގިނިކަންޏާ ތަނެއްގައި ހުރުމުން މެނުވީ އެއީ ކިހާވަރެއްގެ ކަމެއްކަން އިހުސާސުކޮށްލަންވެސް ނޭނގޭނެ ކަމަށާ އެމަނިކުފާނު ބަންދުކޮށް ދިން ޖިސްމާނީ އަނިޔާއާ ނަފްސާނީ އަނިޔާގެ ބަދަލު އެމަނިކުފާނަށް އެއްވެސް ބަޔަކަށް ނުދެވޭނެ ކަމަށެވެ.

މީގެ އިތުރުން ރައީސް ޔާމީން ވިދާޅުވީ އެއީ ހަރާންހުކުމެއް ކަމަށް އޭރު އެންމެ އަޑު ގަދަ ކުރި ބޭފުޅުްނގެ ސަރުކާރެއް މިހާރު އޮތް އިރު އެ ހަރާންހުކުމް ޖެހި ފަނޑިޔާރުގެ މައްސަލަ ބެލެންވާނެ ކަމަށާ އެ ހިތްވަރު ސަރުކާރުގެ ވެރިންގެ ކިބައިގައި ހުންނަން ވާނެ ކަމަށެވެ.

ހަމަ އެހެންމެ އެ ހުކުމް ކުރުމަށް ފަހު ދެން ގާޒީ ޝަކީލަށް ފަނޑިޔާރުކަން ލިބިގެން ދިއުމާ އަދި އެއަށް ފަހު އާމްދަނި އާ ނުބައްދަލު ބޯހިޔާވަހިކަން ހޮދާފައިވާކަމުގެ މައުލޫމާތު ލިބިފައިވާ ކަމަށާ އެހެންކަމުން އެ މައްސަލަވެސް ބެލެން ވާނެ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އެމަނިކުފާނު ފްރޭމުކޮށް ކުރި މަނީ ލޯންޑަރިން ދައުވާގެ ކުށް ސާބިތުވާކަމަށް ކަނޑައަޅާ ހުކުމް ކުރުމަށް ފަހު ވަޑައިގެން ގާޒީ ޝަކީލު ކުރެއްވީ މަނީ ލޯންޑަރ ކަމަށެވެ.

ރައީސް ޔާމީން ވިދާޅުވީ ކުރީ ސަރުކާރުން ރައީސް ޔާމީންގެ މައްޗައް އިއްވީ ހަރާން ހުކުމެއް ކަމަށް ރައީސް މުއިއްޒު އޭރު އިދިކޮޅުގައި އޮންނަވާ ވިދާޅުވި އިރު މި ހަރާން ހުކުމް ކުރި ފަރާތްތަކަށް ފިޔަވަޅު އެޅުން އޮތީ ރައީސް މުއިއްޒުގެ އަތްމަތީގައި ކަމަށް ވެސް ރައީސް ޔާމީން ވިދާޅުވިއެވެ.

އެންމެ މަތީ ކޯޓު، ސުޕްރީމް ކޯޓުގެ ފަނޑިޔާރަކަށް ހުރީ އަލީ ރަޝީދުކަމަށާއި އެންމެ ފުރަތަމަ ހުކުމް ޖެހީ އޭނާކަމަށް ރައީސް ޔާމީން ވިދާޅުވިއެވެ. ހުކުމް ޖަހާ ނިންމިއިރު މައްސަލަ ސާފުކުރުމަށް އަލީ ރަޝީދު ކުރި އެއްވެސް މަސައްކަތެއް ނެތް ރައީސް ޔާމީން ފާހަގަކުރެއްވި އެވެ.

ޖޭއެސްސީ، ރައްޔިތުންގެ މަޖިލިސް އަދި ވެރިކަން، ހުރިހާ ގޮތެއް މިއަދު މި ސަރުކާރުގެ ވެރިންގެ އަތުގައި އޮތް އިރު އޭރު ހަރާންހުކުމް ކުރި ފަރާތްތަކަށް ފިޔަވަޅު ނޭޅި ފަހަތު ފަޔަަށް ބުރަވަނީ ކީއްވެތޯ ރައީސް ޔާމީން ސުވާލު ކުރެއްވިއެވެ.