PNF ah Libemun Dhaa Tharuheebu Varah Ragalhu: Hussain Waheed

ރައީސް ޔާމީން އަލަށް އުފައްދަވާ ސިޔާސީ ޕާޓީ ޕީޕަލްސް ނޭޝަނަލް ފްރޮންޓް (ޕީއެންއެފް) އަށް ލިބެމުންދާ ތަރުހީބު ވަރަށް ރަނގަޅުކަމަށް ޕާޓީގެ ކަންކަމުގައި އިސްކޮށް ހަރަކާތްތެރިވާ ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެއްޖެއެވެ.

ހުސައިން މިފަދައިން ވިދާޅުވެފައިވަނީ ޗެނަލް 13 އިން ގެނެސްދޭ ޕީއެންއެފްގެ "އަދާހަމަ" ޕްރޮގްރާމްގައި ވާހަކަދައްކަވަމުންނެވެ.

އެގޮތުން ހުސައިން ވިދާޅުވީ ރާއްޖޭގެ އެކިކަންކޮޅު ތަކުން ޕާޓީއަށް މީހުން ސޮއިކުރަމުންދާކަމަށެވެ. ރައީސް ޔާމީނަށް މީހުން ކުރާ ތާއިދު ފަނޑުވެފައިނުވާކަން ވެސް ހުސައިން ފާހަގަކުރެއްވިއެވެ.

ޕީއެންއެފަށް ގިނަ އަދަދެއްގެ މީހުން ޖޮއިން ކުރަމުން އެބަދޭ. އަޅުގަނޑުމެންގެ އެކި އެކި ޓީމްތަކުން ޒަމާނީ ވިސްނުމާއި އެއްގޮތައް ކެމްޕެއިން ކުރައްވަމުން އަންނަނީ ޕާޓީއަށް މީހުން ވެއްދުމުގައި. ރާއްޖޭގެ އެކި ކަންކޮޅުތަކުން ލިބެމުންދާ ތަރުހީބު ވަރަށް ރަނގަޅު. ޕާޓީ ރެޖިސްޓާ ކޮށް އެންމެ ފުރަތަމަ ޖަލްސާގައި ރައީސް ޔާމީން ބައިވެރިވެވަޑައިގަތުމަކީ އަޅުގަނޑުމެންގެ އުންމީދު.

- ހުސައިން ވަހީދު

ޕީއެންއެފްގައި މިއޮތީ ރައީސް ޔާމީންގެ ޕީޕީއެމް އަދި ޕީއެންސީގައި އޮތް ފިކުރު ކަމަށްވެސް ހުސައިން ވަހީދު ވިދާޅުވިއެވެ. މިވަގުތު ދިވެހިރާއްޖޭގައި އެންމެ ތާޒާކޮށް އޮތީ ރައީސް ޔާމީންގެ ފިކުރުކަމަށާއި އެމަނިކުފާނަކީ ދިވެހިރާއްޖެ ދުށް އެންމެ ވަރުގަދަ ޝަހުސިއްޔަތުގެ ވެރިޔެއްކަމަށްވެސް ހުސައިން ވަހީދު ވަނީ ވާހަކައިގައި ފާހަކުރައްވާފައެވެ.

ޕީޕީއެމް/ޕީއެންސީ ތެރެއިން ރައީސް ޔާމީން އެކަހެރި ކުރައްވާ އެމަނިކުފާނުގެ މަޝްވަރާ އާއި ލަފާ ނުހޯއްދަވައި އުޅުމުން އެމަނިކުފާނުވަނީ ޕާޓީން ވަކިވެވަޑައިގެން އައު ސިޔާސީ ޕާޓީއެއް އުފައްދާފައެވެ.