އަންހެނަކު ރަހީނުކުރި މައްސަލައިގައި ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ އަމިއްލައަށް މަރުވާން މަސައްކަތް ކޮށްގެން އައިޖީއެމްއެޗްގައި ފަރުވާ ދެމުން ދަނިކޮށް އާދަމް އަތުހަރު (32އ) މަރުވީ ދަންޖެހިގެން ކަމަށް އޮޓޮޕްސީ ރިޕޯޓުން ދައްކާފައިވާ ކަމަށް ފުލުހުން ހާމަކޮށްފިއެވެ.
ފުލުހުން މިފަދައިން ހާމަކޮށްފައިވަނީ މިއަދު ބޭއްވި ފުލުހުންގެ ކްރައިމު އިންވެސްޓިގޭޝަން ޑިޕާޓުމަންޓުގެ ނޫސްވެރިންގެ ބައްދަލުވުމުގައެވެ.
ޗީފް ސުޕްރިޑެންޓް އޮފް ޕޮލިސް، ހަސަން ޝިފާއު ވިދާޅުވީ، އާދަމް އަތުހަރުގެ އޮޓޮޕްސީ ރިޕޯތް ލިބިފައިވާ ކަމަށެވެ. އެ ރިޕޯޓުގައި މަރުވާން ދިމާވި ސަބަބެއްގެ ގޮތުގައި ލިޔެފައިވަނީ "ކޮންސިސްޓެންޓް ވިތް ޑެތް ޑިއުޓު ހޭންގިން" ކަމަށެވެ. އަދި އަތުހަރުގެ މަރުގެ ސަބަބަކީ އެއީކަމަށާ ލިބިފައި ހުރި މައުލޫމާތު ހާމަކުރެވެން ހުރީ އެ މިންވަރަކަށް ކަމަށް ޝިފާއު ވިދާޅުވިއެވެ.
ފުލުހުން އަތުހަރު ހައްޔަރު ކޮށްފައިވަނީ މިދިޔަ މަހުގެ 29 ވަނަ ދުވަހު މާލޭގައި އަންހެނެއްގެ ކަރުގައި ވަޅި ޖައްސައި އެ އަންހެން މީހާ ރަހީނު ކުރުމަށް އަތުހަރު ކުރި މަސައްކަތުގެ ތެރެއިންނެވެ.
އެއަށްފަހު ފުލުހުންގެ ބެލުމުގެ ދަށުގައި އަތުހަރު ހުއްޓާ އޭނާވަނީ ސޯޓެއްގެ ނާޑޫވާ ބޭނުންކޮށްގެން ދަން ޖެހި މަރުވާން މަސައްކަތްކޮށްފައެވެ. އަދި އެ ކަމަށް ފަރުވާ ދެމުން ދަނިކޮށް އަތުހަރު މަރުވީ އަޖީއެމްއެޗްގައެވެ.
