.ނ. ހޮޅުދޫގައި މަރުވެފައި އޮއްވާ ފެނުނު ޒަކިއްޔާ މޫސާގެ އޮޓޮޕްސީ ނުހެދީ ހަދަން ޖެހޭ އިތުރު ސަބަބެއް ފާހަގަނުވާތީކަމަށް ފުލުހުން ހާމަކޮށްފިއެވެ.
އިސްކަންދަރު ކޮށީގައި ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ޒަކިއްޔާގެ ހަށިގަނޑު ރާއްޖެ އިން ބޭރަށް ގެންގޮސްގެން އޮޓޮޕްސީ ނުހެދީ ހަށިގަނޑުން ނަގަން ޖެހޭ ސާމްޕަލްތަކާއި ތަހުލީލްތައްކޮށް ސްޕެޝަލިސްޓް ޑޮކްޓަރުންގެ ފަރާތުން ހޯދަން ބޭނުންވި ރައުޔުތައް ހޯދުމަށް ފަހު އޮޓޮޕްސީ ހަދަން ޖެހޭ ސަބަބެއް އޮތް ކަމަށް ތަހުގީގަށް ނުފެންނާތީ ކަމަށެވެ.
ނަމަވެސް ޝިފާއު ވިދާޅުވި ގޮތުގައި މައްސަލަ އަންނަނީ ތަހުގީގު ކުރަމުންނެވެ. އެގޮތުން ތަހުގީގު ޓީމެއް މިހާރު ވެސް ތިބީ ހޮޅުދޫގައި ކަމަށް އޭނާ ވިދާޅުވިއެވެ.
މި މަހުގެ 10 ވަނަ ދުވަހު އުމުރުން 50 އަހަރުގެ ޒަކިއްޔާ ނިޔާވެފައި އޮއްވާ ފެނުނީ އޭނާ ދިރިއުޅޭ ގޭގެ ބަދިގެ ފަރާތުގައި ހުންނަ ގުދަނެއް ކައިރިންނެވެ. ނިޔާވެފައި އޮތް ތަނުގައި ވަޅިއެއް އޮތް އިރު އޭނާގެ ކަރުގައި ވަޅި އަޅާ ބުރިކޮށްލާފައިވާ ކަމަށް މައުލޫމާތު ލިބިފައިވެއެވެ.
