މާލެ ސިޓީގައި ގެއެއްގެ ހަވަނަ ފްލޯއިން ދޮރެއްގެ ބިއްލޫރިގަނޑު ވެއްޓި މީހަކު ޒަހަމުވެއްޖެއެވެ.

ފުލުހުން ބުނީ މާފަންނު ޖަހާމުގުރި ގޯޅީގައި ހުރި ގެއެއްގެ ހަވަނަ ފްލޯ ގެ ދޮރެއްގެ ބިއްލޫރިގަނޑެއް މަގުމައްޗަަށް ވެއްޓިފައިވާ ކަމަަށެވެ.

މި ހާދިސާގައި ބިއްލޫރިގަނޑު ވެއްޓި ސައިކަލެއްގައި ޖެހި ތަޅައިގެން ދިޔަ ވަގުތު އެ ސައިކަލްގައި އިން މީހާގެ ގަޔަށް ބިއްލޫރިތައް ބުރައިގެން ގޮސް އެމީހާ އަށް އަނިޔާވެފައިވާ ކަމަށް ފުލުހުން ވިދާޅުވިއެވެ. ފުލުހުން ވިދާޅުވި ގޮތުގައި އެ ސައިކަލަކީ އެ ވަގުތު އެ ތަނުގައި ޕާކް ކުރަން އުޅުނު ސައިކަލެކެވެ.

އެމީހާ އަށް ފަރުވާ ދިނުމަށް މިހާރު އައިޖީއެމްއެޗަށް ގެންގޮސްފައިވާ ކަމަށް ފުލުހުން ވިދާޅުވިއެވެ. މި ހާދިސާއާ ގުޅިގެން ބަލަން ޖެހޭ ކަންކަން ބަލަމުން ގެންދާ ކަމަށް ވެސް ފުލުހުން ވިދާޅުވިއެވެ.