ރައީސް ޑރ. މުހައްމަދު މުއިއްޒުގެ އުސްލޫބަކީ ނުވަތަ ސްޓައިލަކީ ފަސޭހަ ކަމާ އެކު ދޮގު ހެދުން ކަމަށް ކުރިގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ސަރުކާރަށް 10 މަސް ވެގެން ދިޔައިރު ރައްޔިތުންގެ އިހުސާސުތައް ހުރި ގޮތުގެ ކުރު ވީޑިއޯއެއް ހިއްސާ ކުރައްވާ އެކްސްގައި ކުރެއްވި ޕޯސްޓެއްގައެވެ.

ޑރ. ޖަމީލު ވިދާޅުވީ، ރިޔާސީ އިންތިހާބަށް ދެއްކި ހުސް ގޮނޑި އާންމު ރައްޔިތުންނަށް އޮޅުވައެއް ނުލެވޭނެކަމަށާ ރައީސް މުއިއްްޒުގެ އުސްލޫބަކީ ފަސޭހަކަމާއިއެކު ދޮގު ހެދުންކަމަށެވެ.

މީގެ އިތުރުން ރައްޔިތުންނަށް ލިބެން ޖެހޭ އަސާސީ ހިދުމަތްތައް ކަށަވަރުކޮށް ސަރުކާރުން ނުދޭތީ އެކަމަށް އިޝާރާތްކުރައްވާ ޑރ. ޖަމީލު ވިދާޅުވީ، އާސަންދައަށް ޚަރަދުކުރަން ހުރި ފައިސާކޮޅުން ޑްރޯން ގަތުމަށް 500 މިލިއަން އަދި 3000 ހާހަކަށް ސިޔާސީ މަގާމުތަކަށާއި ބޭކާރު އެމްބަސީތަކަށް ހޭދަކޮށް ރައްޔިތުން ބިކަ ހާލުގައި ޖައްސައިފި ކަމަށެވެ.

ޑރ. ޖަމީލު މިފަދައިން ވިދާޅުވެފައިވާއިރު، ސަރުކާރަށް 10 މަސްވެގެން ދިޔައިރު ރައްޔިތުންނަށް ކުރި ރާހަތަެއް ނެތުމުން ރައްޔިތުން ގެންދަނީ ސަރުކާރާ މެދު ހިތްހަމާ ނުޖެހުމާ ނުރުހުން ފާޅުކުރަމުންކަން ފާހަގަކޮށްލެވެއެވެ.