މީހަކު ރަހީނުކޮށް، އެމީހާގެ އިނގިލި ބުރިކޮށްލި މައްސަލައިގައި ހައްޔަރު ކޮށްފައިވާ ފަރާތްތަކުގެ ތެރޭގައި ހިމެނޭ އެމްއެންޑީއެފްގެ ދެ އޮފިސަރުން ވަޒީފާއިން ސަސްޕެންޑްކޮށްފައިވާ ކަމަށް އެ އިދާރާއިން ހާމަކޮށްފިއެވެ.

މި މައްސަލަ އަކީ މި އަހަރުގެ މެއި 25 އިން ޖޫން 25 އަށް މާލޭގެ ގެއެއްގައި މީހަކު ރަހީނުކޮށް، އެމީހާއަށް ޖިސްމާނީ އެކި އަނިޔާދީ، ގަދަކަމުން މަސްތުވާތަކެތީގެ ވިޔަފާރި ކުރުވާ އޭނާގެ އިނގިލި ބުރިކޮށްލި ކަމަށް ހުށަހަޅާފައިވާ މައްސަލައެކެވެ.

ފުލުހުން މައުލޫމާތު ދީފައިވާ ގޮތުގައި ރަހީނު ކޮށްފައިވަނީ 30 އަހަރުގެ ދިވެހި ފިރިހެނެކެވެ. އޭނާގެ ހަށިގަނޑުން ޖިސްމާނީ އެކި އަނިޔާ ލިބިފައިވާ ކަމަށް ރިޕޯޓްތަކުން ދައްކާ ކަމަށްވެސް ފުލުހުން މައުލޫމާތު ދީފައިވެއެވެ.

މި މައްސަލައިގައި ހައްޔަރުކޮށްފައިވަނީ އަލީ ސާމީ (24އ)، ރ. ކަނދޮޅުދޫ، މިހުރާ އަހުމަދު ސާއިފް ވަހީދު (18އ)، ގދ. ގައްދޫ، ހުދުވެލި މުހައްމަދު ނައުޝަން ހުސެއިން (21އ)، ތ. ތިމަރަފުށި، އުތުރުގެއާގެ މުހައްމަދު ނަފާހު (23އ)، ކ. މާފުށި، ފުލްމޫން އަހުމަދު ޒަޔާން (24އ)، ލ.ގަން/ތުނޑި، ލިންކް އެވެ.

މި ފަސް މީހުންގެ ތެރެއިން އަލީ ސާމީ، އަހުމަދު ސާއިފް ވަހީދު، މުހައްމަދު ނައުޝަންގެ އިތުރުން އަހުމަދު ޒަޔާން، ޝަރީއަތުން ގޮތެއް ނިމެންދެން ބަންދު ކުރުމަށް އަމުރު ކޮށްފައިވާއިރު، މުހައްމަދު ނަފާހު މައްސަލައިގެ ތަހުގީގު މަރުހަލާ ނިމެންދެން ބަންދު ކުރުމަށް އަމުރު ކޮށްފައިވި ވެއެވެ.