ކޮރަޕްޝަންގެ ވާހައަކީ ދައްކާ ދައްކާ ނުނިމޭނެ ވާހަކަތަކެވެ. ކޮންެމެ ވެރިއަކު ވެރިކަމަށް އަޔަސް އަބަދުހެން އަނގަ ހުޅުވާދައްކަން މިޖެހެނީ ކޮރަޕްޝަން ގެ ކޮންމެސް ވާހަކައެވެ.

އެންމެ ފަހުން އާންމުކޮށްފައިވާ 2023 ވަނަ އަހަރުގެ ކޮރަޕްޝަން ޕާސެޕްޝަން އިންޑެކްސްއަށް ބަލާލިޔަސް ފެނިގެން މިދަނީ ދިވެހިރާއްޖޭގައި ކޮރަޕްޝަންގެ މިންވަރު އޮތް ވަރެވެ. ރާއްޖެ އަދިވެސް ހިމެނިފައިމިވަނީ 50 ޕޮއިންޓްއިން ދަށުން ސްކޯ ކުރާ ތިންބައި ކުޅަ ދެބައި ގައުމުތަކުގެ ތެރޭގައިކަން މި ބަޔާނުންވެސް ހާމަ ވެގެންދެއެވެ.

ކޮންމެ ވެރިއަކުވެސް ވެރިކަމަށް އަންނަނީ އެ ވެރިއެއްގެ ދައުރުގާ ކޮރަޕްޝަންގެ އަމަލު ނުހިންގާނެ ކަމަށް ބުނަމުންނެވެ. އެ ވެރިއަކު ވެގެން ދާނީ ކޮރަޕްޝަންއާ ދެކޮޅުވެރިއެކޭ ބުނަމުންނެވެ. މިއީ ކޮންމެ ވެރިއަކުވެސް ކިޔާ އެއް ބައިތެއްހެން ދައްކާ ވާހަކައެވެ. އެހެންނަމަވެސް މިކަމަށް ފުކުގެ ބަދަލެއްވެސް އަންނަ މަންޒަރެއް ފެނިގެންދެއެވެ.

ކޮރަޕްޝަންގެ މައްސަލަތައް އިންތިހާޔަށް ބޮޑުވަމުންދާއިރު މި މައްސަލަތަކަށް ހައްލެއް ލިބިގެންދާތަން ނުފެނުމީ ހިތާމަ ވެރި ކަމެކެވެ. މިއިން އެންމެ މައްސަލައަކަށް ފިޔަވަޅު އަޅަމުން ދާތަނެއްވެސް ނުފެނެއެވެ. ކޮރަޕްޝަންގެ އަމަލުތަކުން މި ގައުމު މިއޮތް ހަލާކުވަނީ އެވެ.

މިހެންކަން ހިނގާއިރު މުއައްސަސާތަކުގެ މަސައްކަތްތައް މިހާރަށް ވުރެ ހަލުވި ކުރަން އެބަޖެހެއެވެ. މިކަންކަމަށް ފިޔަވަޅު އެޅެން އެބަޖެހެއެވެ.

އެންޓި ކޮރަޕްޝަން ކޮމިޝަނާމެދުވެސް އާންމުންގެ އެތައް ޝަކުވާއެއް އެބަހުއްޓެވެ. އެތައް އަހަރެއްވީ މައްސަލަތައްވެސް ހައްލެއް ނުލިބި ފުނިޖެހިފައި އެބަހުއްޓެވެ. މި ކަންކަމަކީ އެތައް ރައްޔިތެއްގެ ޝަކުވާއެކެވެ. ކޮންމެ ދައުރެއްގައިވެސް އޭސީސީ ފެންނަނީ ރައްޔިތުންގެ ނުހަނު ގިނަ ޝަކުވާތަކާއި ކަންބޮޑުވުންތައް އޮތް މުއައްސަސާއެއްގެ ގޮތުގައެވެ. މައިގަނޑު ކަންބޮޑުވުމަކަށް އޮންނަނީ ކޮމިޝަނަށް ހުށަހެޅޭ މައްސަލަތަކުގެ ތަހުގީގުތައް ލަސްވުމެވެ.

އޭސީސީން ސިޔާސަތުތައް އެކުލަވާލުމުގެ މަސައްކަތް ކުރަމުން އަންނަތާ އެތައް އަހަރެއް ވެގެން ހިނގައްޖެއެވެ. އަބަދުވެސް އިވިގެން މި ދަނީ ކޮންމެވެސް ދިރާސާއެއް ކުރާ ވާހަކައެެވެ. އެހެންނަމަވެސް ކުށް ކުރާ މީހުން އޭގެ ނާޖާއިޒު ފައިދާ ނަގައި، ނުފޫޒު ފޯރުވުން ފަދަ އެތައް ކަމެއް ހިނގަމުންދާއިރު މިކަންކަމަށް ނަޒަރު ހިންގާލާނެ މީހަކު ނުވެއެވެ.

ބޮޑެތި ވައްކަމާއި ހިޔާނާތުގެ ތުހުމަތު ކުރެވޭ މީހުން އެ ފައިސާއިން އެދަނީ ބޮޑެތި ވިޔަފާރި ކުރަމުންނެވެ. އިންސާފުގެ މަގަށް ނުގެނެވި އެތައް ދުވަހެއް މިދަނީ ލަސްވަމުންނެވެ. މިކަންކަން ހިގާއިރު އޭސީސީ އޮތީ ކޮންތާކުތޯ؟

ފާހަގަ ކޮށްލަންޖެހޭ މި ސަރުކާރުވެސް ވެރިކަމަށް އައީ ކޮރަޕްޝަން ގެ މައްސަަލަތަކަށް ހައްލު ހޯދައިދޭނެ ކަމަށް ބުނަމުންނެވެ. މިއަދު ރައްޔިތުން މިތިބީ ކޮރަޕްޝަންގެ މައްސަލަތަކަށް މި ސަރުކާރުން ފިޔަވަޅު އަޅާނެ ގޮތަކަށް ބަލަބަލައެވެ.

މި ވާހަކަތަކަކީ ކިތަންމެ ވަރަކަށް ދެއްކިޔަސް ނިމުމެއް ނެތް ވާހަކަތަކެވެ.