މާލޭގެ މަގުތަކުގައި ބޭނުން ނުކޮށް ގިނަ ދުވަސްވެފައިވާ 224 ސައިކަލު ޓޯކޮށްފި އެވެ.
މާލެ ސިޓީ ކައުންސިލާއި ފުލުހުންނާއި ލޯކަލް ގަވަމެންޓް މިނިސްޓްރީން ގުޅިގެން ފެށި ހަރަކާތުގައި މި އުޅަނދުތައް ޓޯކޮށްފައިވަނީ އިއްޔެގެ ވަގުތެއްގައި ކަމަށް މައުލޫމާތު ލިބިފައިވެއެވެ.
މާލޭ މަގުތަކުގައި ހުރި ގިނަދުވަސްވީ އުޅަނދުތައް ނަގަނީ މާލެ ސިޓީގެ މަގުތަކަކީ ސާފުތާހިރު ހިތްފަސޭހަތަނަކަށް ހެދުމަށްޓަކައި ކުރެވޭ މަސައްކަތުގެ ތެރެއިން ކަމަށް މާލެ ސިޓީ ކައުންސިލުން ވަނީ ބުނެފައެވެ.
މިގޮތަށް ނަގާ ވެހިކަލްތަކާ ހަވާލުވުމަށް އޮންނަ މުއްދަތުގައި ހަވާލު ނުވެއްޖެނަމަ ނައްތާލުމުގެ މަސައްކަތްވެސް ފުލުހުން އަންނަނީ ކުރަމުންނެވެ.
މިއަހަރު ކުރީކޮޅުވެސް މާލެ ސިޓީ ކައުންސިލުން ވަނީ ފުލުހުންނާއި ޓްރާންސްޕޯޓް މިނިސްޓްރީއާއި ގުޅިގެން މާލޭގެ މަގުތަކުގައި ހުރި ދުވަސްވީ އުޅަނދުތައް ނަގާ ނައްތާލުމުގެ މަސައްކަތްކޮށްފަ އެވެ. އެފަހަރު ވަނީ ހަތަރު ފުރިޅުލީ އުޅަނދުތަކެއްވެސް ނަގާފަ އެވެ.
