އިމާމުންގެ ކަންކަމުގައި މަޝްވަރާ ހޯދުމަށް އިމާމުންގެ މަޖިލީހެއް އުފައްދަވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

އިއްޔެ ބޭއްވި އިމާމުންގެ މަހާސިންތާ ނިންމާލުމުގެ ޖަލްސާގައި ވާހަކަފުޅު ދައްކަވަމުން މިނިސްޓަރ ވިދާޅުވީ އެ މަޖިލީހުގައި ކުރާ މަޝްވަރާގެ ލަފާގެ މަތިން މިނިސްޓްރީގައި އިމާމުންނާބެހޭ ކަންކަން ކުރިއަށް ގެންދާނެ އިންތިޒާމު ވެސް ހަމަޖެއްސެވުމަށް މަސައްކަތް ކުރާނެ ކަމަށް ޝަހީމް ވިދާޅުވި އެވެ.

މީގެ އިތުރުން، ރާއްޖޭގައި ހުރި އިސްލާމީ މަރުކަޒުތަކަށް ދެ އިމާމަކު ހަމަޖައްސާނެ ކަމަށާއި އޭގެ ތެރެއިން މައި އިމާމަކަށް ހުންނާނީ ޑިގްރީއަށް ކިޔަވާފައި ހުންނަ އިމާމެއް ކަމަށާއި ދެން ހުންނަ އިމާމަކީ ބަންގި ދިނުމަށް ހާއްސަ އިމާމެއް ކަމަށް ޝަހީމް ވިދާޅުވި އެވެ.

އިމާމުންގެ ތެރޭގައި ތަފާތު އެކި ބަލިތައް ތަހައްމަލުކުރަމުންދާ އިމާމުން ތިބިކަން ފާހަގަކުރައްވާ ޝަހީމް ވަނީ އިމާމުންނަށް އިންޝުއަރެންސް ދިނުމަށް މަސައްކަތް ކުރަމުންދާ ކަމަށް ވިދާޅުވެފަ އެވެ.

މި މަހާސިންތާ ކުރިއަށް ގެންދިޔައީ ޖުމްލަ 508 އިމާމުންނާއެކު އެވެ. އެގޮތުން މި މަހާސިންތާގައި އޮންލައިންކޮށް 300 އިމާމުން ބައިވެރިވި އެވެ.