މި މަހުގެ 109 ވަނަ ދުވަހު ބަންކަރިންގ ހިދުމަތް ފެށުމުން ސުވާލުތަކެއް ބޮލަށް ސަވާރުވެގެންދިޔައެވެ. އެގޮތުން ރާއްޖޭގައި ބަންކަރިންގ ހިދުމަތްދޭން ހަވާލުވެގެން އުޅޭ "ވިޓޯލް އިންކް" އަކީ ކިހާވަރެއްގެ ކޮންބައެއްކަން މި ސަރުކާރުގެ ވެރިންނަށް ހަމަ ނޭނގިހުރެދާނެހެއްޔެވެ. ބަންކަރިންގެ ހިދުމަތް ދިނުމަށް ގަތަރުގެ ކުންފުންޏަކާ އެކު އެމްއޯޔޫއެއްގައި ސޮއިކޮށްފާ އޮއްވާ ވީނުވީއެއްނޭނގި ވިޓޯލްއާއި ބަންކަރިންގ ހިދުމަތް ދިނުމަށް ރާއްޖޭން ހަވާލުކުރީ ކީއްވެހެއްޔެވެ. އޭގެ ފަހަތުގައި އޮތީ އަޑިނޭނގޭ ކޮންކަހަލަ ކަންތައްގަޑެއް ހެއްޔެވެ.

"ވިޓޯލް އިންކް" އަކީ ކޮބާ؟

ވިޓޯލް އަކީ ޑަޗް މަލްޓިނޭޝަނަލް އެނާޖީ އެންޑް ކޮމޮޑިޓީ ޓްރޭޑިން ކުންފުންޏެކެވެ. ސްވިސްގައި މައި އޮފީސް ހުންނަ ވިޓޯލް އުފެދުނީ ނެދަރލޭންޑްގެ ރޮޓަޑަމްގައި 1966 އަހަރުގައެވެ. މިހާރު ވިޓޯލްއަކީ ދުނިޔޭގެ އެންމެ ބޮޑު ހަކަތަ ވިޔަފާރިކުރާ ކުންފުނިތަކުގެ ތެރެއިން އެއް ކުންފުންޏެވެ. ހަކަތައިގެ ވިޔަފާރި ކުރާ އެތައް ކުންފުންޏެއް ވިޓޯލްގެ ސަބްސިޑަރީ ކުންފުނިތަކުގެ ގޮތުގައި މަސައްކަތް ކުރެއެވެ. ވިޓޯލް އިންކް (ވިޓޯލް) އަކީ އެތައް ކުންފުންޏެއް ބައިވެރިވެފައިވާ ވިޓޯލް ގްރޫޕް އޮފް ކޮމްޕެނީސް އެވެ. އެނާރޖީއާއި ކޮމޯޑިޓީ ވިޔަފާރީގައި ދުނިޔޭގެ އެތައް ގައުމެއްގައި ވިޓޯލް ހަރަކާތްތެރިވެއެވެ.

ދެން މިއޮތީ ވިޓޯލް އިން ކަންތައް ކުރާ ގޮތުގެ ވާހަކައެވެ. ގައުމުތަކުގެ ސަރުކާރުތަކުގެ ވެރިންނަށް ރިޝްވަތުދީގެން ވިޔަފާރި ހޯދުމުގައި ވިޓޯލަކީ ދުނިޔެއަށް މަޝްހޫރު ބައެކެވެ.  15 އަހަރުގެ މުއްދަތެއްގެ ތެރޭގައި ވިޓޯލް އިން އެތައް މިލިއަން ޑޮލަރެއްގެ ރިޝްވަތު ގިނަ އަދަދެއްގެ އާންމު އޮފިޝަލުންނަށް އެމެރިކާ ބައްރުގެ ވަކިވަކި ތިން ގައުމެއްގައި ދީފައިވާކަން ރިސާޗްތަކުން ހާމަވެގެންދެއެވެ. ރިޝްވަތުން ވިޓޯލްއަށް ބޮޑު ނާޖާއިޒު ފައިދާތަކެއް ލިބުނެވެ.

ވިޓޯލް އިން ބްރެޒިލާއި އިކުއެޑޯ އާއު މެކްސިކޯގެ ސަރުކާރުގެ އޮފިޝަލުން ތަކަކަށް ރިޝްވަތު ދީގެން ފައިދާހުރި ވިޔަފާރީގެ ކޮންޓްރެކްޓްތައް ކާމިޔާބުކޮށްގެން އެ މީހުންނަށް އިންސާފުވެރިކަމާއެކު ނުލިބޭނެ ވާދަވެރި ފައިދާތަކެއް ހޯދުމަށް މަސައްކަތް ކޮށްފައިވާކަން ވަނީ ސާބިތުވެފައިވެއެވެ. އެ ކުންފުނިން ޖޫރިމަނާގެ ގޮތުގައި 16.6 މިލިއަން ޑޮލަރު ދައްކަން އެއްބަސްވެފައި ވެސް ވެއެވެ. 2010 އިން 2018 އަށް ރިޝްވަތުގެ ސްކީމްތަކުގައި މުވައްޒަފުން ބައިވެރިވެފައި ވާކަން ހާމަވެ، މި ކޮރަޕްޓް ހަރަކާތްތަކުގެ ތެރެއިން 26.5 މިލިއަން ޑޮލަރު ހޯދާފައިވެއެވެ.

2020 ވަނަ އަހަރު ޑިސެމްބަރު މަހުގައި ވިޓޯލް ވަނީ އެފްސީޕީއޭގެ ރިޝްވަތާ ދެކޮޅު މާއްދާތަކާ ހިލާފަށް އިކުއެޑޯއާއި މެކްސިކޯ އަދި ބްރެޒިލްގެ އޮފިޝަލުންތަކަކަށް ރިޝްވަތު ދިން ކަމަށް އެއްބަސްވެފައެވެ. ވިޓޯލް ވަނީ ޔޫއެސް ކްރިމިނަލް ޑިވިޝަންގެ ފްރޯޑް ސެކްޝަނާއި ނިއުޔޯކުގެ އިރުމަތީ ޑިސްޓްރިކްޓްގެ އެމެރިކާގެ އެޓާރނީ އޮފީހާ އެކު ޑިފެއާޑް ޕްރޮސެކިއުޝަން އެގްރީމަންޓެއް ވެސް ވަނީ ހަދާފައެވެ.

އޭގެއިތުރުން ވިޓޯލް ގްރޫޕްގެ ކުންފުނިތަކާ ގުޅިފައިވާ ވިޓޯލް އިންކް (ވިޓޯލް) އިން ފޮރިން ކޮރަޕްޓް ޕްރެކްޓިސް އެކްޓް (އެފްސީޕީއޭ)އާ ހިލާފުވެގެން ޔޫއެސް ޖަސްޓިސް ޑިޕާރޓްމަންޓުން ކުރަމުންދިޔަ ތަހުގީގެއް ލަސްކުރުމަށާއި ބްރެޒިލްގައި ހިނގަމުންދިޔަ އެއްވައްތަރުގެ ތަހުގީގެއް ލަސްކުރުމުގެ މުގާބިލުގައި 135 މިލިއަން ޑޮލަރު ވިޓޯލުން ވަނީ ދައްކާފައިވެއެވެ.

ވިޓޯލް އިން އެދުމެއްނެތި ވެދުމެއްކުރާނެތޯ؟

ރިޝްވަތު ދީގެން ހައްގު ނޫން ފައިދާ ހޯދުމުގައި ދެވަނައެއްނެތް ވިޓޯލުން ރާއްޖޭގައި ބަންކަރިންގެ ހިދުމަތް ދިނުމަށް ހަވާލުމިވީ ސަރުކާރުގެ ވެރިންގެ ބަޔަކަށް ރިޝްވަތުގެ ގޮތުގައި ގިނަ އަދަދަކަށް ފައިސާ ދީގެން ނޫންކަމެއް ވެސް ނޭނގެއެވެ.

ވިޓޯލް އަކީ ދުނިޔޭގައި ރިޝްވަތު ދީގެން ވިޔަފާރި ހޯދުމަށް އަރާހުރި ކުންފުންޏަކަށްވާއިރު ރާއްޖެ ފަދަ ގައުމެއްގައި ރިޝްވަތާ ނުލާ އެއްވެސް ކަމެއް ކުރާނެކަމަށް ގަބޫލެއް ނުކުރެވެއެވެ. ވިޓޯލް ފަދަ ބިޔަބޮޑު ކުންފުންޏަކުން ތަޖުރިބާ ކުރުމުގެ ގޮތުން ކަމެއް ކުރުމަކީ އެކަށީގެންވާ ކަމެއްނޫނެވެ.

މިކަމުގައި ބޮޑެތި ސިއްރުތަކެއްވާކަމީ އެއްވެސް ޝައްކެއް އޮތްކަމެއް ނޫނެވެ. ސަރުކާރުން ވިޓޯލް އާއެކު އެއްބަސްވުން ހެދި އިރު ވިޓޯލްއަ ބެހޭގޮތުން ދިރާސާވެސް ނުކޮށްލަނީބާއެވެ. ސަރުކާރު އެހާ ފަރުވާކުޑަ ވެގެންވާވަރުގެ ކަމެއް ވެސް ނޫނެވެ.

ވިޓޯލުން އޮފްޝޯ ބަންކަރިންގ ރާއްޖޭގައި ތަޖުރިބާކޮށް ނިމޭއިރު އެސްޓީއޯ އަށް މީގެން ވާނެ އެއްވެސް ފައިދާއެއް ނޯންނާނެއެވެ.