އަދަދު ނޫހުން ނެރުނު ޑޮކިއުމެންޓަރީއާ ގުޅިގެން ކްރިމިނަލް ކޯޓުން ނެރުނު އަމުރާ ހިލާފުވެފައިވާ ކަމަށް ނިންމައި، ސަރުކާރުގެ ވިޔަފާރި ކުންފުނި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ މުވައްޒަފަކު ވަޒީފާއިން ކަނޑާލައިފި އެވެ. މި މުވައްޒަފު ވަކިކުރީ އެ ކުންފުނިން ހިންގި އެތެރޭގެ ތަހުގީގަކަށް ފަހުގަ އެވެ.
އެސްޓީއޯއިން އެ މުވައްޒަފަށް ފޮނުވި ސިޓީގައި ބުނެފައިވަނީ، އޭނާ ސޯޝަލް މީޑިއާގައި ކުރި ޕޯސްޓެއްގައި ކްރިމިނަލް ކޯޓުގެ އަމުރާ ހިލާފުވެފައިވާ ކަމަށާއި، މީގެ އިތުރުން ކުންފުނީގެ މުވައްޒަފުން ހިފަހައްޓަންޖެހޭ އާންމު ސުލޫކީ މިންގަނޑާ ވެސް އޭނާ ހިލާފުވެފައިވާ ކަމަށެވެ. އެސްޓީއޯގެ ތަހުގީގުން ދައްކާ ގޮތުގައި، އެ ޕޯސްޓުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ފަސްޓް ލޭޑީ ސާޖިދާ މުހައްމަދަށް "ނިސްބަތްކޮށް ފުރައްސާރަކުރާ ފަދަ އިބާރާތްތައް" ބޭނުންކޮށްފައިވެ އެވެ.
ކްރިމިނަލް ކޯޓުގެ ގާޒީ މުޒައްމިލު ނާސިރު ނެރުއްވި އަމުރުގައި ވަނީ މި ޑޮކިއުމެންޓަރީ ދައުރުކުރުން މަނާކޮށް، އެ ވީޑިއޯގައި ހިމެނޭ އެއްވެސް ވާހަކައެއް ސީދާގޮތުންނާއި ނުސީދާގޮތުން ދެއްކުން ހުރިހާ ރައްޔިތުންގެ މައްޗަށް މަނާކޮށްފަ އެވެ. މި އަމުރުގައިވާ ގޮތުން، މައްސަލައާ ގުޅޭ އެއްވެސް ލިޔެކިޔުމެއް ނުވަތަ މައުލޫމާތެއް އެއްވެސް ސިފައެއްގައި ފެތުރުމަކީ ކޯޓު އަމުރާ ހިލާފުވުމެކެވެ.
ވަޒީފާއާ ބެހޭ ގާނޫނުގައި ވާގޮތުން މަސައްކަތުގެ އަހުލާގީ މިންގަނޑަށް ތަބާނުވާނަމަ ފިޔަވަޅު އެޅުމުގެ ބާރު ވަޒީފާ ދޭ ފަރާތަށް ލިބިގެންވެ އެވެ. ނަމަވެސް، ވަޒީފާގައި އެއް އަހަރު ވެފައި ނުވާ މުވައްޒަފަކު ވަކިކުރާ ނަމަވެސް ދެ ހަފްތާގެ ނޯޓިސް ދޭން ޖެހޭނެ ކަމަށް ގާނޫނުގައި ބަޔާންކޮށްފައިވެ އެވެ. މި މައްސަލާގައި އެ މުވައްޒަފު ވަކިކުރީ ކޮން ޕޯސްޓަކާ ގުޅިގެން ކަމެއް ސާފެއް ނުވެ އެވެ.
ކްރިމިނަލް ކޯޓުން ނެރުނު މި "ގެގް އޯޑަރު" ނުވަތަ އަނގަބަންދު ކުރުމުގެ އަމުރު މިހާރު ވަނީ ހައި ކޯޓުގައި އިސްތިއުނާފުކޮށްފަ އެވެ. ގާނޫނީ ދާއިރާގެ ބޭފުޅުން ފާހަގަކުރައްވާ ގޮތުގައި، މުޅި ރައްޔިތުންގެ މައްޗަށް މިފަދަ އަމުރެއް ހިންގުމަކީ ގާނޫނުއަސާސީން ކަށަވަރުކޮށްދޭ ހިޔާލުފާޅުކުރުމުގެ މިނިވަންކަމާ ފުށުއަރާ ކަމެކެވެ.
