ފުލުހުން ޓޯކޮށްފައިވާ އުޅަނުތަކުގެ ތެރެއިން އޭގެ ވެރިފަރާތުން ހަވާލުނުވި 22 އުޅަނދެއް ނައްތާލައިފި ކަމަށް އި އިދާރާއިން ހާމަކޮށްފިއެވެ.

ފުލުހުން ހާމަކޮށްފައިވަ ގޮތުގައި 21 ސައިކަލަކާއި އެއް ކާރު ނައްތާލާފައިވެއެވެ. އެ އުޅަނދުތައް ނައްތާލީ ޓޯ ކުރުމަށް ފަހުގައި ވަކި މުހުލަތެއް ދިނުމުން އެ މުހުލަތުގެ ތެރޭގައި އެ އުޅަނދުތަކާއި ވެރިފަރާތުން ހަވާލު ނުވުމުން ކަމަށެވެ.

މީގެ އިތުރުން ގަވާއިދާއި ޚިލާފަށް ގިނަ ދުވަސްތަކެއް ވަންދެން ބޭނުން ނުކޮށް ހުރި އަޅުނދުތައް ޓޯވް ކުރުމުގެ މަސައްކަތް ސިޓީ ކައުންސިލާއި ގުޅިގެން ކުރަމުން ގެންދާ ކަމަށްވެސް އެ އިދާރާއިން ބުނެފައިވެއެވެ.

އެއްގަމު ދަތުރުފަތުރުގެ ގާނޫނުގައި ބަޔާންކޮށްފައިވާ ގޮތުގެ މަތިން ރަޖިސްޓްރީނުކޮށް ބަންޑާރަ މަގުތަކުގައި ދުއްވާ އަދި ޕާކް ކުރާ އުޅަނދުތަކާއި އެހެން ޒޯންތަކުގައި ރަޖިސްޓްރީކޮށްފައިވާ އުޅަނދުތައް "އޭ" ޒޯންގައި ދުއްވާ ދުއްވުމާއި ޕާކް ކުރުމާއި ބޭނުންކުރުން ހުއްޓުވައި އެ އުޅަނދުތައް ގާނޫނާއި ގަވައިދުތަކުގެ ތެރެއަށް ގެނައުމުގެ ފުރުސަތު ދިނުމުގެ ގޮތުން ދަތުރުފަތުރާއި ބެހޭ ވުޒާރާއާއި ކަމާ ގުޅުން ހުރި ވުޒާރާތައް ގުޅިގެން ހުޅުމާލޭގެ ލޮޓް ނަންބަރު 452 ބިމުގައި އުޅަނދުތައް ވަގުތީ ގޮތުން ބަހައްޓާނެ އިންތިޒާމު ވަނީ ހަމަޖައްސާފައެވެ.