ސަރުކާރު ހިންގާ މައި ޕާޓީ ޕީއެންސީގެ ޕީޖީ ގްރޫޕްގެ ލީޑަރ އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް އެދިގެން މިނިސްޓްރީ އޮފް ހެލްތް އިން 10 ފަރާތަކަށް ވަޒީފާ ދިންކަން ހާމަވެއްޖެ އެވެ.

"ތޭރަ އޮންލައިން" އަށް މައުލޫމާތު ދެމުން ހެލްތް މިނިސްޓްރީގައި އިސްކޮށް މަސައްކަތް ކުރާ ފަރާތެއް ބުނީ މި 10 މުވައްޒަފުންނަށް އެ ވުޒާރާއިން ވަޒީފާ ދިނުމަށް މެމްބަރު ފަލާހް ހެލްތް މިނިސްޓަރ ޑރ.އަބްދުﷲ ހަލީލްގެ އަރިހުން އެދިފައި ވަނީ މަޖިލިސް އިންތިޚާބް ތެރެއިންކަމަށެވެ.

މިނިސްޓަރ ހަލީލް ފުރަތަމަ އެކަމަށް އިންކާރު ކުރުމުން މެމްބަރު ފަލާހް ދެން އެކަން ކުރަން ނިންމެވީ ރައީސް އޮފީހުގެ މިނިސްޓަރ އަލީ އާރިފް މެދުވެރިކޮށެވެ. އެގޮތުން އަލީ އާރިފް ވަނީ މިނިސްޓަރ ހަލީލަށް އެމީހުންނަށް ވަޒީފާ ހަމަޖައްސައިދިނުމަށް އަމުރުކޮށްފައެވެ. މިނިސްޓަރ ހަލީލް އެކަމާ ފަހުން އެއްެބަސްވީ ރައީސް މުއިއްޒުގެ އިތުބާރު ހޯދުމުގެ ބޭނުމުގައި ކަމަށްވެސް ވަނީ މައުލޫމާތު ލިބިފައެވެ.

މި 10 މުވައްޒަފުން ވަޒީފާއަށް ނިކުންނަން ފަށާފައިވާކަމަށް ވެސް އެ ވުޒާރާއިން ނަން ހާމަނުކުރުމަށް އެދި މައުލޫމާތު ދިން ފަރާތުން ވަނީ ބުނެފައެވެ.

ސިޔާސީ މަގާމްތަކަށް މީހުން ނުނެގުމަށް ފިނޭންސް މިނިސްޓްރީން އަންގާފައި ވަނިކޮށް އެފަދައިން ވަޒީފާ ބަހާފައި އެވަނީ މަޖިލިސް އިންތިޚާބާ ދިމާކޮށް ވޯޓު ހޯދުމުގެ ބޭނުމުގައެވެ.

މެމްބަރު ފަލާހް ވަނީ މަޖިލިސް އިންތިޚާބްގައި ކާމިޔާބުވުމަށްޓަކައި ގިނަ އަދަދެއްގެ ފަރާތްތަކަށް ވަޒީފާ ދޭނެކަމުގެ ޔަގީންކަން ދެއްވާފައެވެ.